Pieri si volte

Barete fracade, voi bas e milante pinsîrs pal cjâf, fintremai lis ultimis peraulis de barufe cun la femine, a Pieri i pareve di sclopâ.
Al sintive di volêi une vore di ben a chê che par lui e jere “la sô frute”, ma par lui la cjace no si tocje! Al volarès dî di dineâ la sô vite di frut, dongje di so nono par trois e rapârs, boschetis e cjamps, simpri gnovis aventuris e simpri emozions di no crodi! Mil voltis miôr di dutis lis partidis di balon dai siei amis o dal cine par sôs sûrs.
Si la fe che la frute e voleve lâ intal centri comerciâl a provâsi lis novitâts di colôrs e de mode. La puarte si jere sierade sul zigâ de sô frute e a lui i vaìve il cûr di sintî ancjemò la vôs vaiulinte dal so ben.
Di bot e sclop i veve parût parfin di sintîsi a clamâ: “Pieriii!” L’aiar i puartà la vôs de sô frute, vôs rote dal vaî e lui si zirà di colp, masse di colp, cun la sclope che i sbrissà di man e colà in pîts… Daspò la flamade e il ton Pieri si sintì lizêr, jevâsi adalt e cjalâ la sô frute butade sul cuarp restât par tiere, disfigurât, zigant e sberghelant il so non: berlis di gjavâi il cûr!
“Tu tu sês la mê frute biele, no stâ a vaîmi, si viôt che al jere il gno destin e jo ti restarai simpri dongje par cisicâti dut il gno ben. Cuant che ti sintarâs un veli di aiar su la tô musute minude o sarai jo che ti cjareci par visâti dal ben che ti ai volût e ti volarai simpri, tu la mê frute par simpri…”

di Barbara Battel
#1093

Note: esercizi par il laboratori “Anatomie di une conte”

2 coments On Pieri si volte

  • Oltri le conte, cussi ben metude che nome Barbara e sa da il troi just a lis peraulis intun racont, ancje le sostanzie de conte le cjati fuarte, sie pûr tant cjariade di dolôr, e no mancul di amôr. Barbara ten dûr contecurte che il plasè di leiti al è simpri grant, e no dome de bande me, ma di tancj. Lussian

  • O soi dacuardi cun Lussian su la conte e no dome, parcè che al à reson cuant che al dîs che o sin in tancj a volê lei lis tôs simpri interessantis contis.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît