Anatomie di une conte

Mandi a ducj, Contecurtârs e soredut, aspirants contadôrs di storiis che magari a capitin dispès in Ostarie par leilis ma magari a varessin voie ancje di contâlis.

Chest event al è par voaltris, scritôrs cence contis!

Ma anin par ordin. Za o savês che al è inpins il concors Vôs de Basse, inmaneât dal Sportel associât pe Lenghe Furlane dai Comuns di Cjarlins, Gonars, Muçane, Porpêt, Prissinins e San Zorz di Noiâr, tignût de nestre Coghe Fuguline. Plui voltis us vin invidât a dâ un segn di “resistence” partecipant, parcè che cuant che une iniziative e ten di cont i piçui (e a chi piçulis no son dome lis contis, ma ancje la lenghe doprade) la miôr maniere par mostrâ che a une robe i si ten e je chê di partecipâ, magari cun pôc, magari cuntune conte brute, ma che si à fat la fature di mandâle. In chestis iniziativis a son dispes i numars chei che a contin, e cuant che i Comuns a metin bêçs in premi nol è tant il “ce biel ce biel” a tignî inpins une robe, ma plui che altri il “ce tancj che a àn partecipât”. E al è par chest che o vin gust di publicâ cheste iniziative propite vuê.

Contecurte e je stade simpri intindude dal vuestri Ostîr e di chei che a son ator di lui come une ativitât di Resistence, ma di resistence in sens larc, intindude intal sens calvinian dal tiermin: cjatâ ce che a nol è Infier e fâlu durâ. E no o crodin che la nestre Ostarie e sedi alc di fâ durâ e no podìn fâ di mancul di tignî di cont lis iniziativis che nus judin. Par chest cuant che Vôs de Basse al clame, Contecurte e rispuint. No covente visâus dal desio che i vin cumbinât tes premiazions dal an passât no mo?

Insome, ven a stâi che inte suaze de culture furlane o vin cjatât un altri copari che nus dâ fiducie, nuiemancul che la SFF, che nus à permetût di inmaneâ chest event (in linee, che ducj a puedin partecipâ!) dal dut dibant che al à il non di ANATOMIE DI UNE CONTE!

Ce robe ise? E nie… l’Ostîr al à decidût di meti dongje la sô esperience di contadôr di storiis cu la sô esperience di professôr e al à pensât di fa un seminari par scuvierzi cemût che a son fatis lis contis curtis ben jessudis. Si provarà a indagâ cual che al è il mecanisim che al sta sot de narazion e insome… come che e dîs la locandine, un LABORATORI DI NARAZION E SCRITURE CREATIVE, dividût in dôs parts.

Si che duncje, al è za di un pôc che l’Ostîr al trafiche par capî cemût meti dongje teorie e pratiche dal scrivi contis. E cumò i pâr di jessi rivât a bon: une introduzion sul formalisim des storis, la solite diference dal intrîc e storie, cun esemplis, e dopo pardabon une anatomie di contis, doprant nuiemancul che lis contis premiadis intal concors, par scuvierzi i trucs e ce che al è dentri. E dopo, clare, un invît a meti in pratiche la robe e a provâ a partecipâ al concors!

Insome… mandait une mail al sportel pe lenghe furlane e iscriveitsi al laboratori che si tignarà ai 6 e ai 10 di Mai, aes vot e mieze sot sere. L’event al sarà metût adun su Google Meet e al sarà une vore facil partecipâ cul vuestri ordenadôr. E ocjo che nol è un laboratori par scrivi contis “par furlan”, ma par scrivi contis in dutis lis lenghis dal mont. Ostîr e Coghe us spietin!

Lis dôs datis no son alternativis, ma a fasin part di un unic percors, che al met dongje Teorie e Pratiche. Se un al pues partecipâ a une sole date no son fastidis, parcè che a ducj i iscrits ur rivarà dut il materiâl doprât.

Domandis e Rispuestis

• Il laboratori isal fat di dôs lezions compagnis o sono diferentis?

La seconda che hai detto 🙂 A son dôs lezions diferentis. La prime e je plui teoriche, la seconde plui pratiche.

• Isal un probleme se o cumbini di fâ une sole date?

No! Nissun fastidi. O preparin un materiâl di fornî ae fin de lezion cuntun struc di ce che al vignarà dite tal laboratori, che al vignarà mandât ai iscrits. Clare che al è biel fâlis dutis dôs, ma va ben ancje une des dôs.

• Ma lis dôs datis sono colegadis? Se no fâs une no capìs chê altre?

Nuuuu. A son su aspiets diferents dal scrivi contis, e cun di plui, o fasarìn un piçul struc di ce che o vin dite te prime, par tacâ la seconde. Ma lis dôs lezions a puedin sei gjoldudis ancje par cont lôr.

• Ma se cumbini cussì cussì cui oraris, e o sai di rivâ tart, isal un probleme?

Posisappo! Nissun fastidi. Lis lezions a son in linie, e cuant che un al rive in ritart nol disturbe nissun e si capìs distes.

• Ma dulà sono lis lezions?

Sul vuestri ordenadôr. Us baste vê un account google, che di sigure o vês, e us vignarà inviât dal sportel il leam par jentrâ e seguî il laboratori.