CoceCurte Day – La Croniche!

Ben po… Un sucès! O almancul cussì nus à parût a nô, îr di sere, daspò di vê metût a puest dut i davoi che o vevin fat li dal Spaccio Raffl, in ocasion dal CoceCurte Day, la gare di contis curtis di chest an, dulà che lis contis si disfidin.

E par cui che nol jere… ben po, che al ledi su la pagjine fb de Osterie e al cjate nuiemancul che la direte facebook, cun dut l’event di cuant che al è tacât ae fin! Ma za che sin, o vin gust di fâus une biele croniche strucade par contâ la serade. !

La prime robe che nus capite e je cheste ca: une vorone di int! Bon… cualchi parint dal Ostîr, cualchi parint dai letôrs, cualchi parint dai musiciscj… i sta, ma va che va che o avistin ancje int che e rive di Buenos Aires e int che rive di Mortean, o di San Vidot, o di Codroip e che ai nestris events no si jere mai viodude. Insome… un biel pocjis di musis gnovis, comprendût cualchi gnûf contecurtâr che o sperin che al ledi indenant a scrivi pe osterie, che al sarès biel.

Lis contis in gare, a grops di 4, a jerin chestis ca, e lis metarìn sù su la ostarie a tacâ di passantdoman, une in dì, cussì o podês gjoldilis cun calme.

• L’arc di San Marc di Stiefin Stefanut (lete di Checo)
• La gnot dai cadutiscj canibai di Alessio Ecoretti (lete di Michêl)
• EMO di Checo Tam (Lete di Astrid)
• La barete di Laurin Zuan Nardin (Lete di Zuanluche)
• Ce doi coçons di Stefano Asquini (lete di Checo)
• Fufente di Lenart Gjavedon  (lete di Michêl)
• La cantine di Massim Furlan  (Lete di Astrid)
• Pauli il cjaçadôr di Gianluca Franco  (Lete di Zuanluche)
• Riflès de gnot di Guido Covazzi  (lete di Checo)
• Il gjeneradôr di Rafaêl Serafin (lete di Michêl)
• ESSE di Astrid Virili (Lete di Astrid)
• Vonde di Noemi Salva (Lete di Zuanluche)

E lis contis che a àn passât il turni a son stadis La cantine, La barete e ESSE, ancje se lu podês viodi miôr tal cartelon a forme di coce fat de gjatemarangule. Cui aial vinçût? Nuiemancul che la nestre Astrid Virili, che bisugne dî che no à cjatât aversaris, stant che la sô conte, ESSE (S di strie, S di salvadie…) e à propite convinçût simpri almancul la metât dal public! Vitorie meteradissime e prin premi metût in dote propite dal spaç, come il secont, vinçût di Laurin Zuan Nardin, e il tierç, a Massim Furlan. Bisugne propi dî che i contecurtârs plui afidabii a àn ben figurât e che fâ alenament a scrivi al zove une vore.

Un discors par so cont al va fat par la senografie… la nestre gjatemarangule e ideât e fat sù plui di 50 cocis di doprâ pes votazions, metût adun cocis di meti ca e là, comprât lûs, lumins e lusitis che nus àn fat fâ un figuron. La parone di cjase, di prionte, e à zontât rosis dentri tes cocis e une schirie di cocis cu la musate. E l’Ostîr al à parturît almancul une ventine di contecurtutis, che a àn fat gjoldi ducj cuant che a son stadis letis a metraie dai nestris 4 letôrs: Checo, Michêl, Astrid e Zuanluche.

Cun di plui, il nestris fotograf di fiduce, Stiefin Stefanut, insiemi a Stiefin Asquin e a Alessio Ecoretti a son ae lôr prime conte in Osterie!

E un discors in bande al va fat par il ghiringhel finâl, stant che Sara, la parone di cjase, e la mari dal Ostîr, a devin vê capît che a vignivin a mangjâ dute la scuadre di rugby dai All Blacks, par trop che a àn fat di mangjâ… polpetutis, torte cocemiluç, mortadele, formadi, struc di miluç cjalt, tramezins, crostuts cu la marmelade di coce… in sumis… che cuasi centenâr di personis che o jerin no sin rivâts adore a finî dut, pûr pûr metût in modalitât “cavalete bibliche”.

Altri ce dî? Ma sigure! cundut di cualchi fastidi tecnic al microfon e de lontanance de incuadradure o vin fate ancje la direte facebook, par contentâ ancje chei che nus cjalavin di cjase, sedi di ca dongje, sedi di là de aghe grande.

E des musichis, no vino di dî? O vevin sul palc il 66,6% dai URTIE che a vevin preparât par ogni conte une piçule intro di musiche che zuiant di fantasie e gjoldiment e deve une jentrade ae conte une vore gustose! Margarite e Marte, po dopo, insiemi cun Stiefin, a àn scugnût ancje lei la conte in finâl, e pensait che no savevin nancje cuale che e jere e lu àn scuvierzût in chel moment.

E no vino di dî ancje di Lupo Manarie, che al è rivât cuant che al jere za finît dut e a jerin vanzâts dome i siei amîs, come che o viodês ben dai dissens di Jacum e Ricart, i nestris piçui aiutants di Contecurte, presincj jenfri il public insiemi al Strion Pedeon, Fuoco Fausto, Impiro il vampiro e v.i.

Altri de croniche no us spiin. Parcè che o sin ancjemò sturnîts dal sucès de serade, ben puartade indevant dal Ostîr, che come simpri al prepare la robe par ducj e dopo si smentee di stampâsale par sè e al scuen domandâi ae gjatemarangule nons e titui. Pôc mâl… nus pâr che la int si sedi divertude istès, o anzit… forsi propit par l’aiar zuiarin, di noaltris che no si cjapìn masse pardabon.

Us lassin un pocjis di fotos dal nestri Muini e altris o cjatais inte pagjine dai spetacui, in cjar e vues.

A la prossime serade!