Lis Contecurtutis dal Cocecurte Day

Ilusion

n spissul di sanc. La int e busine, alc nol à funzionât. Intal voli de soubrette, sierade inte casse magjiche, la lûs si scjafoie. «Ilusion finide, come il nestri amôr», i cisiche lui.

di Jacum Trevisan

Halloween party at the Dallas Highland Park High School

Miercus Addams de tierce, il paiaç di It de prime, la pipine sassine dal ultin an, il prof Smith vistût di Jason, la bidele lôf e cussì indevant fin che o varai discjamât ducj i colps dal me M4!

di Rudy Citòs

Pecjât

La pistole e slusì par un lamp intant che la bale i faseve sclopâ il cjâf. Al colà sul jet cence rumôr, maglant mûr e bleons. E sierà il video sul telefonut, sfladant. «Pecjât pe lûs che no je otimâl».

di Margarite Cogôi

Trê Stelis Michelin

Siôr Fraiot al decidè di lâ a crustâ tun puest famôs pe cjar. Cruste tant di sclopâ, spandint ator tocs, budiei e fruçons di cerviel. Il camarîr al cjapà sù dut: al sarès stât il prossim plat gourmet.

di Alessio Ecoretti

Odiât

Di cuant che al veve tacât a fevelâi… lu odiave! Lu odiave plui di ogni altre robe inte vite. Il so tasê… la piel grispade… al meretave di murî! Al cjolè un curtissat e al poiâ il poleâr su la bree.

di Rafaêl Serafin

Superpoteri

Il Diu dai supererois i de un podê inutil: resurî lis budiesis… E di prionte dome se muartis di vecjaie! Tant lu preà che lu convincè a zontâi alc altri. «Tu podarâs resurî… ancje lis moscjis!»

di Rafaêl Serafin

Cjamps di cocis

A vevin semenadis di ogni, di podê sielzi. Ma Lise, il 31, no si decideve e al vignì scûr. Pierdude! Dopo dôs oris e vaive, dopo trê e vuicave, dopo cinc si sgrifignave la muse. No le cjatarin plui.

di Rafaêl Serafin

Disgracie

Al veve intaiade une coce cetant perfete, che no dome i veve ridût in muse, ma i veve parfin mangjât il nâs e cumò, rodolantsi tra sanc e miarde al pareve un Voldemort dai puars, colât in disgracie!

di Rafaêl Serafin

Nol è un spieli

O torni cjase mê e mi cjati denant me. «Desidera?» mi domandi. «È uno scherzo?» mi rispuint. Cussì o fâs par jentrâ e chel jo che no jeri jo al clame i carabinîrs. Mi arestin cence nancje scoltâmi.

di Rafaêl Serafin

Storie De Vite e Des Oparis di une Strie Biele e Buine

… … … finide.

di Rafaêl Serafin

Gnot de Vilie dai Sants

Miute no scovâ la cjase, e metè fûr la aghe e e lassâ la lûs impiade. E spietà dute la gnot ma nol rivâ nissun. Parcè chest an no jerin vignûts? Le cjatarin come durmidide, cui braçs poiâts in taule.

di Rafaêl Serafin

Une blesteme scrite sul mûr

La vedue le cjatà grande come dute la cjase. E jere contente che l’om, chê gnot, al fos tornât. Ma ce rabiôs… E sì che i veve parfin preparât la sgnape buine, chê tal fiasc compagn di chel de varechi

di Rafaêl Serafin

Imortâl

Al veve fat di model pe scuele di paruchîrs, sartôrs e tatuadôrs. Al veve fat di cavie pai miedis chirurcs e pai patolics des autopsiis. Ma cumò vonde! Va ben dut… Ma la broade cul ketchup, no eh.

di Rafaêl Serafin

Secje e Patoc a van al cine

Ma no ti fasial ingomut mangjâ cudui? Lui al pacje e nol rispuint. Jo no dîs çurviel, ma almancul popcorn, come ducj! Lui al supe un altri vier dal so braç frait. Mi lassistu cjalâ il film in pâs?

di Rafaêl Serafin

Fantàsie

«Îr a mangjâ sushi cun Sauron. Vuê a bevi biris cun Darth Vader! La gnot tal jet di Thanos e doman al cine cun Voldemort?»  La mari di Fantàsie e sbrocâ: «No ise ore di cjatâsi un murôs decent!»

di Rafaêl Serafin

E par ultime nuie di mancul che…
La conte di pôre plui curte dal monAAAAAHHHH!!!

di Rafaêl Serafin