Ce aio fat di mȃl par scugnȋ vierzi un scluset e bagnȃ la blave a trȇ di gnot!
Maledete fumate, isal pussibil che no si viodi nuie? Vemi ca, cumò o ai di stȃ atent a poiȃmi cun dȏs mans su le puartele, ma ce isal inte aghe? Ben, ancje dȃ i numars mi somee masse, ma no puedin jessi riflès, nol è nancje un tic di lusȏr! E somee une persone, bon, no stin a mateȃ … gnot nere, fumate, se o ai di deventȃ mat al sarès il moment just, ma pȏre no ind’ ai mai vude.
Une vȏs «Oh contadin».
E cumò cui isal? Di po, no soi ca par divertiment.
«contadin… slungjimi une man».
Mi vegnin i sgrisui, ma al à di jessi cualchi fantaҫat che al à voie di coionȃ…
«tirimi fûr, ti prei…»
Ma tirȃti fûr di indulà, stupidat, spiete che o torni a alҫâ la… miserie crodie! Al è cualchidun inte aghe!
«Cjapimi pal braç».
Eh no, no stin a fâ monadis, chi al è un cuarp e jo cumò o visi… ma cui visio che no ai ni telefonin ni nuie, o vevi dome di zirȃ un scluset e tornȃ a durmȋ.
«Contadin».
Cui isal? Cjale che o clami i carabinȋrs! Parcè tremio? O ai di stȃ atent che il canȃl al è pericolȏs cuant che al è plen, miȏr che mi poi, ven fûr di li, ce stȃstu fasint, e sarà frede la aghe, su po!
«Se no tu vuelis tirȃmi fûr, ven tu ca di me».
Ma tu tu sȇs fûr cui sintiments e po no rivi nancje a vioditi ben, sȇstu un fantaҫut o ce… o soi lat fûr di gamele, cun cui stoio tabaiant?
«Tu mi cognossis, sì, tu mi âs copȃt un pȏcs di agns indaûr, sassin!»
Ce? Cjale, ti ai lassȃt mateȃ ancje masse a lunc, jo no ai mai copȃt nissun!
«Sȇstu sigûr? E chel frutat che al vignive su cheste rive a sunȃ le armoniche, simpri content, indulà isal lȃt?»
Ce sgrisul pe schene, ce saie cheste vȏs di me, no suni plui ma o ai istès une biele vite.
«Sȇstu sigûr, no varessistu voie di sunȃ ancjemò?»
O ai dome bisugne di tornȃ a durmȋ!
«Polse un moment, cjantimi alc come che tu fasevis di piҫul».
Nol fȃs plui frȇt, la fumate e fȃs une coltre di plume, o provi a jentrȃ inte aghe e o cjanti in pȃs, cumò o pues ancje indurmidȋmi.
di Guido Covàs
#1***
