EMO

E jere di bessole. No jere rivade a vê il costôs biliet pal conciert.
Fûr dal stadi di San Siro, sentade suntun scjalin, biel che dentri a sunavin i supporters ai The Muse. Ju sintive. Vistude di neri. Cui picets. Lis cjalcis a rêt. More. Un truc pesant. Sì e no sui disesiet agns. No veve nancje il smartphone o pûr, se lu veve, no lu veve tirât fûr. No restave incolade a chel schermi come la plui part dai zovins de sô etât. E veve un aiar come se e stes insumiantsi, fantasticâ…
Cui sa a ce che e pensave. E jo, che le cjalavi, mi disevi: jo a la sô etât o jeri cussì. Di bessole. Spes cun pôcs bêçs par jentrâ intun stadi a viodi un conciert. E o vevi di decidimi se lâ a viodi i Cure o pûr i Cult. O pûr o restavi a sintî il complès di fûr.
O stevi jentrant cul gno compagn a San Siro par viodi i Muse e mi vignive voie di lâ li di chê fantacine e di paiâi il biliet par che e jentràs. O volevi fâ une buine azion, insome. Ma dopo o vevi pensât: cui sa nie a ce che e pense. Magari no à voie di jentrâ.

Insome, il conciert al finìs. A mi i Muse no mi son mai plasûts plui di tant, a part cualchi cjançon. Il gno compagn invezit al jere stât entusiast.
E jo le viôt li. Simpri sentade suntun scjalin, ancje se il conciert al è strafinît. E je ferme. No si môf propit. A disi la veretât ancje prime dal conciert e veve une pose… no mi jeri inacuarte. Imobile. Buh?
O scugni lâ li e domandâi alc.
Alore o resti scaturide. Dongje de fantacine e je une targhete; “EMO in contemplazione”.
Scultura iperrealista di Ron Mueck.

di Checo Tam
#1***