La Disfide dai Dadui – la cronache!

E no vino di contâus alc de Disfide dai Dadui di domenie di sere?
Ma ce discors! Tant par scomençâ, la serade e je lade une vore ben, o almancul cussì nus pâr. La vin tirade un pocje par lis lungjis, ancje se o sin di Contecurte, ma la int e à tignût bot, e si tirade sù cu lis polpetis di sclopit e la fertaie ae fin de serade, bagnade di un bon tai di vin.
Cui vino let? Cui aial vinçût? Il tabelon de gare lu podês viodi chi in bande, ma lu savês che il vincidôr nol è robe masse impuartante. A nô nus interessin lis contis. Bisugne però dâi at a Michêl Londar, il nestri Berlon de Ostarie, che cu la sô prime (e uniche) conte, Lassâsi lâ, clamade propite dai dadui, al à vinçût la competizion, batint in finâl nuiemancul che lis Tristeriis dal Cramâr Pablo Gortan e L’om che al rimbalzave simpri de Sartore. In bande di lôr, a son stadis letis ancje lis contis di Michêl Vuardianut, di Stiefin Morat, di Renzo Brollo, de Coghe Fuguline, di Massarie Margarite e dal vuestri Ostîr. E cui che al è vignût, intant che al spietave, al à podût lei la conte di Checo Tam e de Maghe Olstrele. Lis cjatais dutis sul sît, e cuasi dutis lis podês tornâ a sintî su la nestre pagjine fb, parcè che la Sartore e je rivade e meti la direte (almancul fin che il segnâl internet al à decidût di gjavâ lis tendis di Gjalarian)

Ma inte serade a son stadis metudis dongje une vore di sorpresis. Tant par scomençâ, al è stât presentât il prototip di un progjet che cuissà ce che nus puartarà a inventâ: Lis cjarticontis!
Un mac di 40 cjartis che a judin a scrivi lis contis. Cui che al jere a Gjalarian al à podût parfin grampâsi cualchi prototip di cjarteconte, che a rapresentin Lûcs, Robis, Peraulis e Creaturis. Si sa… intune osterie furlane, no si zuie mica cui dadui? Si zuie di cjarticontis!
E il prin a  zuiâ al è stât propit l’Ostîr Rafaêl che al à pensât ben di fâi tirâ sù a Agnul, il fi de Coghe, nuiemancul che 4 cjarticontis. Lui al varès vût, intant che i letôrs a leievin, scrivi une conte tignint dentri ducj chei elements. Isal rivât? No isal rivât? La imprese e someave dificile, parcè che i elements che i son tocjâts a jerin chescj. Ma la gnove e je che il nestri Ostîr le à petade! Prin des leturis de finâl al à let, a un public in estasi, la sô vore mestre, che e je ancjemò cence un titul, che us lassin di proponi a voaltris comentadôrs pene che la publicarin. (L’ostîr al à di pôc recuperât il sfuei de conte e al à di copiâlu)

E dopo? E dopo i vin dât il batesim definitîf a Jacum Trevisan, che al è uficialmentri il Dorondon de Ostarie. E dopo a jerin nuiemancul che lis ConFusione! Margarite Cogôi e Marta Savorgnan nus àn regalât la lôr musiche, vignude benissim inte cornîs dal curtîl de cjase de Comunitât, e in bande di chê a àn parfin fat la colone sonore des contis. Tocs che a levin di Dolly Parton ai Tarm, di De Andrè a Lizêrs, cover dai Cuinon. Ce domandâi di plui! (Sì, savìn za ce domandâi… di jessi ancje in cualchi prossime serade, prin o dopo…)

E vonde! Un grassie a chei de ProLoco par il bon acet e a dute la Clape de Contecurte, un salût a Plume di ingjustri e a Lussian che a jerin presincj in spirt e nus tegnin simpri di conte. Un grassie a tancj contecurtârs come Gianluca, Carli, Marie che a jerin a li a batinus lis mans e a la mari dal ostîr che a lavorât doi dîs a fâ di mangjâ. Lait su fb a sintî dut ce che o podês e restait in seneose spiete de conte dal Ostîr, scrite cu lis Cjarticontis…

2 coments On La Disfide dai Dadui – la cronache!

  • Ce biele int te fotografie 😉

  • Il plasê che contecurte e vedi vût un bon acet in chel di Gjalarian, par me al è come un dì di sagre, cul displasè purtrop di no podê jessi stat presint.Biele le iniziative des cjarticontis, e cussi ancje le idee di plantâ frascjs di varis bandis dimût che le int e sepi trope bontât che al’ à il vin in contis de nestre cjare ostarie. Un salût a ducj i contecurtârs, cun tancj compliments ai operatôrs di cheste biele sane iniziative. Lussian

Scrîf un coment

This site uses Akismet to reduce spam. Learn how your comment data is processed.

Site Footer

%d bloggers like this: