Imprescj pe Lenghe Furlane

Duncje… dentri de schirie di peraulis nomenadis di Chei di Contecurte e di chei de Corsecurte e jere une cuntune motivazion une vore biele: Imprest.

E je une peraule furlane che e à dentri une anime particolâr, ven a stâi – nus à dite Agnul – la idee di “prestâ” i struments, che a sedin libars, che a puedin jessi dâts in prestit par che a vegnin doprâts di plui int. E je cheste la nature dal “imprest” se o pensais ben, che in chescj ultins agns (desenis o ancje plui, disìn) a son lâts a scuintrâsi cu la nature e la creance dai umans (che e je lade simpri in piês, al è sot dai voi di ducj).

Provait a pensâ cemût che o sin deventâts… O vin “il nestri” tosearbe e lu doprìn 7-10 voltis ad an, o vin “la nestre” idropulitrice, la motosee, il decespuliadôr, il tratorut… e ognidun di chescj imprescj lu doprìn ogni tant e la plui part de sô vite al stâ sierât intun cjanton de cantine o dal capanon o intal scûr de dismentiee… E bon, o sin fats cussì. A nivel economic no coventarès masse a pensâ che cuntune grampe di chescj imprescj si podarès vignî incuintri a lis necessitâts di un borc intîr.

E alore, là che si pues, là che ancjemò la idee de proprietât no je deventade che l’impuartant nol è vê une robe ma gjavâle a di chei altris, ve che al è biel podê condividi e sparniçâ i imprescj…

In tancj, in tai ultins mês, nus vês domandât ce fin che al à fat il Claap, cun ducj i siei imprescj pe lenghe furlane. O vin scugnût doprâ ducj il sît dal gdbtf, ma alc al mancjave. Ce jerial sucedût? Magari cussì no, un cambiament inte politiche dai finanziaments al Claap al veve puartât a une sieridure dal sît, ma al jere pardabon pecjât che cetante robe e fos lade pierdude. Sì che duncje, la Serling e à decidût di vierzi un sît gnûf metint dentri il materiâl che al jere libar o che e à disponibilitât di doprâ. Nol sarà dut, ma al è tant. Il sît al è chest:

www.lenghefurlane.eu

e us invidìn daurman a metilu dentri dai vuestris “preferîts” (fracait su la stelute, adalt a man drete, in sumis). In chest sît o cjatais:

• Il dizionari dal talian al furlan (76.000 e passe lemis, par cuant che no savês cemût che si dîs par furlan)
• Il dizionari dal furlan al talian (par cuant che no savês cemût che si dîs/scrîf par talian)
• Il formari e i cuadris flessionâi, (par viodi la coniugazion dai verps o la declinazion di nons e agjetîfs)
• Il coretôr ortografic in linie (par mendâ almancul la plui part dai strambolots cuant che no sês usâts a scrivi par furlan)

E in bande di chest o cjatais ancje il leam al Dizionari de Lenghe Furlane, che us vin za contât e che o vin intervistât. 

In sumis… nus somee une gran biele gnove.

E za che o sin a cjapâ sù i vues dal CLAAP, che cul Avrîl dal 2025 a nol esist plui, us visin ancje che la plateforme didatiche pe lenghe furlane LENGHIS e je lade sot la supervision di Adrian Cescje e o podês cjatâle a chest leam (E vie ancje chest intai preferîts):

WWW.LENGHIS.ME

E cumò no us reste che tornâ a doprâ chescj imprescj!

1 comment