Ah ce biel!! Lu ai let l'an passât, dut inte sere di san Valantin (mi someave une buine leture pe…
Lis peraulis dai Corsecurtârs
E nie… o vin profitât de jessude dal DLF par scrivi a ducj chei che a àn partecipât ae CorseCurte e domandâi la stesse robe, ven a stâi la lôr peraule furlane prime in classifiche e il parcè.
In tancj nus àn rispuindût, e se o sês curiôs us lassìn lis lôr sieltis, cun cualchi sclipignade di Dizionari de Lenghe Furlane.
La nestre Lorele nus à subit segnalât la peraule PARDABON e e à pardabon dut un mont dentri, a tacâ de sô gjenesi (la cjatais scrite ancje par dabon) e dal fat che par furlan e à un savôr che no si cjate dal sigûr inte traduzion taliane.
Cecilia, di là da la aghe (grande) nus segnale MADRAC, che e jê e veve simpri sintût doprâ in sens figurât, pes personis, e dome dopo lu à intivât tant che sarpint (tipo mostri di aghe). Cumò i vin za mandât il leam al DLF parché e scuvierzi che al è chel che par talian al è la biscia. E di chest us lassìn i proverbis!
Agnul al rive ancje lui come un falcuç su la sô peraule e nus dîs IMPREST e la motivazione e je cheste: “parcè che e derive di une usance antighe di no jessi parons dai struments dal lavôr, che a son di ducj e si dan “in prestit” cuant che al covente. Al varèss di jessi cussì ancje pal timp, pa la tjere, pe aghe, fuc, aiar, vite…”
E dopo e rive Noemi che di mestre furlane nus puarte no dôs peruali, ma dôs espressions maraveosis che dome par furlan si cjatin par descrivi lis part dal cuarp.
La prime e je CÎL DE BOCJE e su chest nus conte:
“O jerin daûr a scuelâ i furlans di Argjentine su le lenghe furlane, a chei che za a savevin alc e ur mancjavin robis plui fondis. Tu imparis cemût si dîs gjambe, smursiel, voli… ma cemût si dîs a ce che al sore la lenghe, dentri de tô bocje, che e siere parsore chel spazi che tu tu dopris par fevelâ. I linguiscj talians a clamin “suns palatâls” a chescj che si fasin cu la lenghe peade al… cîl di bocje. Chei suns particolârs dal Cj e Gj furlan no si ju cjatin in nissune altre lenghe e a fasin il veri caratar de lenghe furlane.
Ma e je ancje fantasie tai furlans che a rivin a nomenâ un toc de la bocje che altris a clamin “palato” o “paladar” in altris lenghis. Par i furlans che toc di vues al fâs il cîl de bocje e jo mi insumie cu lis stelis de bocje, che a si fasin cuant che tu mangjis un pevaroncin e ti sclope dut. O cu lis neulis, che a vegnin fûr cun che tu bevis un buine sgnape di chenti. O un savôr che ti bat il cerviel al è come un lamp tal to cîl de bocje.
Lu sai, o ai avonde inventive. Ma no soi di bessole, a son ducj i furlans che a àn la lenghe in chest plui di mil agns.“
E dopo di cheste nus dîs ancje VUES RABIÔS e ancje ca…
“No mi impensi nancje cemût si dîs in altris lenghis chel vues che tu ti batis cuant che di gnot tu rispuindis ae clamade de nature. O crôt che i mobii si spostin propit par jessi tal to troi tal bagn e cussì tu rivis a colpî chel maledet vues. Chel che ti fâs rabiâ, chel vues rabiôs. E daspò a disin che i furlans a son lamis, che a pensin dome a lavorâ, che no san fâ fieste. Isal un non di vues plui just che chest?”
E l’Ostîr, za che o sin, al zonte une tierce part dal cuarp uman che par furlan e je… maraveose: il PICJECJACIS!
E anìn indenant cun Sandri, che al sielç come peraule BUTEGHE che “Par talian, la bottega, e ricuarde mestris dal passât. Ma la buteghe furlane e je ancje chel puest là che la int si cjate a fâ la spese, a fâ cuatri cjacaris e, parcè no, a contâsi i ultins peteçs. E po… cuant che tu âs la “zip” jù… ducj a dîti “Siere la buteghe” e a fâsi une ridade”.
E vie cun altris peraulis come chês dal nestri Laurin che nus dîs:
CUIABITUR e BRISCJE
La prime l’Ostîr al à scugnût fâsale spiegâ e scuvierzi che e je dongje a “predicozzo” par talian. Le à siete stant che:
– e sune ben
– e riclame alc di sacri
– e sdramatize il sacri
– nus vise simpri che o vignìn dal latin.
Par capî la spiegazion, nus conte che e vignive di un salm: qui habitat in altissimum (mi pâr, plui o mancul) e al è passât de liturgje al ûs ordenari. Come ancje, par esempli, il NOMINEPATRIS (il cjâf), o TU VIGNARÂS AD OREMUS
La briscje invezit parcè che:
– e sune ben
– nus memoree i mieçs di traspuart di une volte, poetics fin tai lôr nons
– e à cun sè un alc di sclâf
– no incuinave
Nello invezit al sgarfe intai ricuarts e nus dîs ZULUGNE e AGAÇON, parcè che “Son dôs peraulis che mi fasin rivivi chel mont indulà che o soi nassût. A son la semence de tiere lì che a son poiadis lis mês lidrîs“.
E par sierâ, par cheste tornade (ma se a rivin altris peraulis o metarin un altri articul) o vin Massim che nus dîs:
“Mi plâs la peraule FRUT. O pensi che e sedi une des primis peraulis che mi visi di vê sintût. Une biele peraule, curte, che no covente nancje cetant sclarî di significât. Jo la dopri dispès e dispès la sint, ancje viers di me, cuant che i vecjos dal paîs mi clàmin cussì, jo che frut propit no soi plui.
La seconde e je SPARNIÇÂ. Si sparnicin lis semencis te tiere, ma ancje i suns tal aiar, lis vôs tes seris cjaldis in Istât. Si sparnicin lis emozions. E soredut si sparnicis i oms, cuntun significât stramp, che par me al pant za un gnûf ricjatâsi dopo tant timp.”
E in sierade, rivadis plui tart, ve che o zonti Patrizie che nus dîs “NININ“, peraule une vore ninine che e je une di chês che e je rivade adiriture a fâsi talianizâ in “ninino, ninina”. E cence smenteâsi che e vûl dî ancje “piçule cuantitât”. E subit daûr nus dîs “SFLANDORÔS“, peraule cetant biele che se tu la talianizis e tu i disis a cualchidun “Sei sflandorosa/o” al intive distès il significât ancje se nol fevele furlan!
O slungjìn ancjemò di une peraule, che nus dîs Lorele, ven a stâi “PARDABON” che i plâs parcè che si le dopre pôc lassant cori un ‘veramentri’ talian. Pardabon al à un biel sunôr, fat di trê peraulis ‘par da bon’.
In sumis… o vin pardabon fat un viaç jenfri des peraulis furlanis plui in agrât ai furlans. A podaressin pardabon lâ indevant cun chest progjet e fâ une liste… Cuissà… intant gjoldeis il DLF!
Dutis lis contis
Lasse une rispueste