Lis peraulis di Chei di Contecurte

Pene che l’Ostîr al à savût dal Dizionari Furlan in linie (cun dentri ancje une buine rate di contribûts gjavâts di cheste Ostarie) al à subit metût in vore il strument! Dome che stant che nol saveve ce peraulis bielis lâ a cirî, al à pensât ben di interogâ… dute la Ostarie! Ur à domandât la peraule furlane che ur plâs di plui, une di risierve e ancje il parcè. Ve ca lis lôr peraulis!

Il BERLON Michêl al dîs che i plâs une vore RAVIÇ par cemût che al sune, e di risierve nus ofrìs COIAR, stant che al è di significât intraducibil par talian. Sul DLF Raviç no lu vin cjatât, ma ben coiar sì!

Il nestri PETEÇON Alessio, invezit, al à un idee dute scalembre de maraveose peraule CJALCJUT, stant che par lui e à un sunôr simpatic che al somee ancje contraditori cul significât, stant che i ricuarde il cjalçut e i fâs vigni tal cjâf un mostri cui cjalcins.

No je di mancul la sô risierve, nuiemancul che la peraule DINDI, che par lui e je une peraule de infanzie, cui dindis che a son creaturis stranis che a fasin sunôrs stramps e il non al è ancjetant. A lui i parevin creaturis alienis che i saltavin fur lant ator pai cjamps…

Il DORONDON Jacum nol podeve saltâ fûr che cuntune peraule une vore social (o sociâl) tant che GHIRINGHEL, che nus pâr pardabon une peraule gustose e furlanissime. E come risierve al met SCLAPEÇOCS (che cun di plui al veve pierdût la ç e al jere saltât fûr un maraveôs “sclapecjocs”, dut di ridi).

E daûr e je rivade la SARTORE Astrid che in fidance dal so non nus à pandût che une des sôs peraulis furlanis e je… VIGNARÛL, stant che non somee par nuie al talian, e cun di plui ancje se sô none lu doprave, jê, pur doprant la machine di cusî e  jessint buine di ricamâ a man cu la gusele, no rive a doprâlu. Nus zonte ancje che il vignarûl al è un imprest che al vise che la gusele no à une sole ponte e soredut cuant che la tele e je gruesse e dure al è une vore util, ancje se al intrighe i moviments.

E la riserve no je di mancul eh, nus dîs SBORFEDÔR stant che secont jê cui che lu à clamât cussì al à induvinât scuasit il rumôr de aghe che e sborfe fûr a rinfrescjâ lis plantis. Ce tantis matinis di îstât passadis a judâ la none lant sù e jù pal ort a bagnâ spadis, soldâts, bocjis di leon e altris rosis cui nons fantastics, e dopo i vâs cui gjeranios e lis fucsiis… Cualchi volte mi fasevin dûl lis jerbatis e o bagnavi ancje chês! Par bagnâ lis verduris a pene semenadis o raventadis al jere indispensabil parcè che al faseve une plovisine fine fine che no moveve la tiere. No jerin come cumò lis gomis cui busuts picinins ma dome gomis che a inagavin e a savoltavin su dut, e se lis plantis no vevin ancjemò rivât a fâ buinis lidrîs a lavin a remengo. (E a proposit, i plasin une vore ancje i superlatîfs furlans cul dopleament… fine fine, planc planc, lontan lontan, ator ator…)

E vignìn a la nestre BIBLIOCHECHE Madalene che e sielç une superperaule… LUVIN! A jê i somee che no centredi nuie cul ogjet che e rapresente (par talian almancul la iniziâl e à la stesse forme dal ogjet) e in plui al sune ancje come “Lu vin”, Lo abbiamo. E e zonte ancje che i samee ancje delicat rispiet a ce che al descrîf. Di risierve nus dîs INTRIGÂ che no dome i fâs ridi pal dopli sens ma i pâr propite un biel sunôr, agressîf, come che dentri e fos une “tigre”.

E rivìn al FAMEI Checo, che figuriti se al diseve une peraule che si podès cjatâ tal Dizionari… VELU-VELU. La peraule, nus dîs, e je simpre dentri des amonizions di so pari, che al usave simprî dîsi di no compuartâsi in ciertis manieris che se no “ti cjapin par un velu-velu”.

E di risierve, par fortune alc di polui potabis, nus dîs MAZURIN che in bande di jessi un biel uciel al indiche al indiche ancje une localitat gjeografiche, il laghi Masuri in Polonie , dulà che a son tancj palûts e uciei, ma pûr trop, mancul poeticamentri al ven di maggiorino, anatra maggiore, e in efiets si cjate ancje Raze grande.

E stant che nissune des dôs peraulis e je dentri dal DLF ve che nus à dât une tierce. SUSTE che dutcâs si cjate ancje tal talian dal ‘800.

Il MUINI Stiefin invezit al veve pôc timp ma non podeve pierdi la ocasion di dâi la sô poie ae peraule SNAIT, e subit daûr a une altre peraule monosilabiche une vore furlane… SBILF!

Che po, vês di savê che Sbilf al è il gjat ros de nestre GJATEMARANGULE, che dut câs no dome e à une peraule furlane in cime de classifiche personâl, ma cheste peraule i plaseve cetant che le à adiriture tatuade suntun braç. La risierve, nus dîs, a son tantis, ma e sielç SALUSTRI e ancje MARIUTINE. Ve ca, dut câs, MARILAMP che al devente il mani di un flôr di talate.

E LA MASSARIE? Nus dîs chest: DISGROPÂ, par vie dal sunôr dûr e materic che al ripuarte ae azion fisiche di disgropâ alc ancje forsit cuntun pocje di fature, e dopo i nons dai familiârs, che a son incredibii, par es. BARBE (il prin e archetipic barbe al veve par fuarce la barbe), MADONE (simpatiche la confusion cu la Madone) e la BRÛT (fasevie simpri il brût?). (E almancul jê e à cjolt dutis peraulis che a son tal DLF)

L’ARCHEOLIC, che si sa, al sgarfe une vore insot in fat di peraulis, al à sielzût FOLC, e nus dîs che “fal ricuarde propite la sveltece dal ogjet e il rumôr che al fâs dopo al contribuìs a formâ une des espressions furlanis plui icastichis: folc che ti trai”. Di risierve al va tirâ fûr une robe che nissun le saveve: RE DI GJARIGULE, che al sarès la Folaga, l’uciel di aghe, vâstu tu a save di dulà che al salte fur il non, dut câs gjarigule al varès di jessi une forme no plui doprade par disi fossâl o riulut, ancje onomatopeiche, il che al funzione pal non. E stant che cheste ca no je une peraule ma une espression lu vin obleât a sielzi une altre. E ve che al è saltât fûr… RACLI! Racli, nus conte, al è stupent parcè che cuant che tu i dâs une raclade a cualchidun tu âs sì une forme di violence ma che e plate une vene une vore rafinade, difat il racli non è un semplic baston ma al è il len che al jude a indrezâ lis plantis. ven a stâi che e je une violence ma cuntun font didatic!

E il CRAMAR? A lui i plâs SGLAVINÂ e SALUSTRI, e anin a cirî la seconde, stant che e je une vore plasude.

Finide? No, ve che e rive ancje la COGHE, che nus dîs ARC DI SANT MARC e FARCADICE e nus spieghe: “Mi plasin lis peraulis furlanis che daûr a platin un mût di jessi e di pensâ, intal prin câs ancje une identitât, che no si pues cjatâ intes traduzions in altris lenghis. Tal secont câs, invezit, no esist propit une traduzion e chest nus puarte indaûr a un mont furlan peât ae tiere, li che ancje un grumut al veve la sô impuartance e al vignive identificât cuntun non, robe che invezit no je sucedude in altris lenghis, tant che tal talian.”

L’OSTÎR, dopo dutis chestis peraulis, al è restât sturnît, e alore al à decidût che al disarà dome une, che par lui, in bande di jessi une peraule bielonone, intraducibile e plene di significâts in divignî, e je ancje la miôr peraule par sierâ in maniere facile e perfete une conte o une poesie, o ancje un articul come chest, SALACOR.