Interviste al Dizionari de Lenghe Furlane

Se Contecurte e je la ostarie de leterature furlane di vuê,

dizionarifurlan.eu, al pues jessi il camarin!

Al è in linie dizionarifurlan.eu il gnûf dizionari dut par furlan e noaltris o vin mandât in mission un colaboradôr vieri de Ostarie par scuvierzi alc di lui. Il Camarîr de Ostarie, Sandri (viôt tu, eh), al à intervistât par nô il Dizionari Furlan!

C[amarîr]: Mandi! Par scomençâ, dînus cui che tu sês e dulà che ti cjatìn.

D[izionari] de L[enghe] F[urlan]: Alore… Intant Bundì! Dutcâs… mi clami Dizionari de Lenghe Furlane, DSF pai amîs, ma anche Dizionari Furlan al baste, e al è facil cjatâmi. Frache su www.dizionarifurlan.eu e tu mi cjatis a ogni ore.

C: Duncje… Parcè un dizionari dut par furlan?

DSF: La domande e varès di jessi: cemût mai che no lu vevin za! Dutis lis lenghis a àn un o plui dizionaris te lenghe stesse (dut talian chel talian, dut todesc chel todesc, dut sloven chel sloven e v.i.): par furlan no lu vevin par vie che la nestre lenghe e je stade minorizade, a son grups di podê politics e economics che le àn tignude sot e a àn cirût di copâle, alore tantis robis che a son normâls, nus es àn gjavadis o impedidis. Isal pardabon il prin?

No, tal 2009 la SFF e veve publicât un Vocabolari furlan, di Federico Vicario: però al jere un pôc un esperiment. In ogni câs al deve il segnâl che un dizionari dut par furlan al coventave.

C: Ce isal in plui e in miôr dai grancj dizionaris che a jerin za, par esempli il Nuovo Pirona e il Faggin?

DSF: Il Nuovo Pirona e il Faggin a son doi lavôrs maraveôs, fats in agns li che no jere la informatiche: si à dome di gjavâsi il cjapiel. Però dispès a àn une corispondence semplice dal furlan al talian, par esempli “dongje” = “vicino, appresso, accanto”. Cheste soluzion e je comude e svelte, ma cualchi volte imprecise (sino sigûrs che “dongje” al vedi ducj i significâts di “vicino”? Sino sigûrs che no ’nd vedi altris diferents?). Il fat di vê di descrivi e ordenâ i significâts par furlan al permet di lâ une vore plui insot e di capî miôr la peraule.

Par altri in chest dizionari gnûf a son une vore di esemplis in plui .

C: Cemût si sielzino i esemplis?

DSF: Biele domande! A son dizionaris li che al è il curadôr a “inventâ” i esemplis (par esempli tal GDBTF e je cussì) e dizionaris li che invezit si fasin citazions. In chest dizionari o vin decidût di meti citazions par tantis resons: parcè che cussì nissun nol podarà dî “Ih, chê peraule li no le cognòs, no le à mai doprade nissun, le varà inventade Carrozzo!”; parcè che cussì si viôt la peraule cemût che e je stade doprade pardabon di cualchidun, intune frase naturâl e no artificiâl; parcè che cussì si fâs cognossi tancj autôrs e tantis oparis, e cheste forsit e je la robe plui biele, parcè che la nestre leterature e à tantis robis bielis, ma al è dificil cjatâlis.

C: Il lavôr isal finît e complet?

DSF: Sêstu fûr? No: in chest moment a son “dome” 20.000 jentradis, ma al è daûr a cressi e, come numar di lemis, al cressarà simpri plui svelt. Però a son za dentri lis peraulis plui dopradis e plui complessis. Intun pâr di agns o varessin di rivâ a meti dentri dut il lessic tradizionâl. E dopo, in altris doi o trê agns tancj neologjisims e cultisims.

Alore al sarà tor des 70.000 jentradis e al sarà avonde complet. Però ducj chei che a lavorin tai dizionaris a disin che un dizionari nol finìs mai, parcè che si pues simpri scuvierzi une peraule che no jere stade regjistrade o parcè che si formin peraulis gnovis.

C: Un consei pai autôrs di Contecurte?

DSF: Doprait chest gnûf dizionari, lait a sbisiâ cun curiositât e passion.

E po in gjenerâl, tal scrivi, al va ben vê passion pes peraulis e inamorâsi di lôr, ma inamoraitsi soredut de lenghe e de armonie tal scrivi: ancje se une peraule e je tant biele, si à di doprâle tal so puest just. Al è come cul mangjâ (permetêtmi un esempli di “ostarie cun cusine”): il frico, la broade, il bacalà e la gubane a son robis buinis e tipichis, ma nol è che par chel si à di messedâlis tal stes plat e pensâ che in chê maniere al è plui tipic e plui tradizionâl.

Alore lait tal camarin di dizionarifurlan.eu, cerçait dut, e savêtnus a dî ce che us pâr!

E par viodi cemût che si dopre o vin metût in vore dute la clape de Osterie!

Ma intant…