Comuniscj? Burlons chei di Pol Pot, beoi chei di Stalin. Fassiscj? A fasevin ridi. SS? Bogns al plui par fâ une scampagnade come cun chei di Bin Laden. ISIS? Diletants. No, no, il piês nemì par Jacum al jere il so vicin di cjase, chel che la domenie di matine, invezit di lâ a messe, al meteve in moto il rumorôs imprest par soflâ vie lis fueiis. Chel che al brusave di dut tal so for: bancâi, plastiche, mobii di formiche, gomis… e cussì Jacum nol olsave vierzi un barcon par no intosseâsi.
Ma Jacum al jere lât li dal Marsiliês, il bintar dal paîs, chel che al veve lavorât in France… chel là po… sì che lu cognossês… al veve brusât lis barachis e lis muiniis lu vevin denunciât… al veve vuadolât gno barbe sul sagrât dal paîs… uh ce tantis botis che al veve cjapât gno puar barbe ta chê dì…
Il Marsiliês al cognosseve ducj ma propit ducj i malandrins, ancje i forescj, financje la “mala” balcaniche!
E cussì, cun cualchi centenâr di euros cumò Jacum al veve un biel BAZOOKA e un sôl colp… nol varès vût di sbaliâ!!!
di Milio dai cjans
#498
9 comments On Il piês nemì
Il scritôr podares par prime robe presentâtsi cul so non e cognon ancje parcè che la sô conte a je gustose.
Milio dai cjans, al è scrit sot, cumò o zonti ancje te conte. pardon. mea culpa
Milio,Sisto al'à impirat Gusto cu la forcje a cuatri dinç parcè la piere di confin le meteve simpri un tic plui in n'à,in che volte nol jere il "panzerfaust ". Biele conte à tant savor di beghes condominials che tant e cuinçin i nestris dis. Lussian
Milio, o varès ancje jo un vicin di cjase cussì.
Astu il numar di telefon dal Marsiliês?
Grassie
Pauli
Usti, un bazooka, da cjantâ "La marseillaise" daspó dal colp di gracie:-)
Jaio
Milio, cun cheste conte a tu podaressis jessi denunziât par istigazion a delincui e maçalizi; baste lei i coments che ducj chei ch'a son a stâ ta un condomini, 'ndan almancul un un sofle fueis sul plui biel misdì, o ben un parcadôr di machine cul cûl indaûr sot dal to barcon. Sâstu trops Marsiliets ch'a coventaressin. Bepi
continuazion
cence contâ chel ch'a ti fâs il barbecue sot dal puiûl..Bepi
Orpo! calme calme… i fasevi par di, ancje se o ves podût… sumosu, no stêt fâ nancje pensâ.
e grassie des bielis peraulis.
Milio
Be… plauso a chel che in lùc di Bazooka al à dopràt il tiermin teutonic Panzerfaust! Nol è che par càs al leieve tai agns 70 i fumuts di vuere de Marvel "Guerra d'eroi?"
Bulo Milio!
CT