CorseCurte – La Classifiche di Avost

O sin tarts di un pâr di dîs, ma ancje la zurie e à cualchi impegn, ogni tant, e nus perdonarês pe spiete.

Cun dut di chest, o savìn ancje che la classifiche e je impuartante fin a un ciert pont, stant che il biel de nestre Corsecurte al è soredut chel di viodi e lei contis e vê il gust di scrivi e contâ storiis. E ancje chest mês di Avost lis storiis a son rivadis.

Come il mês passât, sui 29 partecipants ae competizion, ben 23 di lôr a àn scrit il lôr toc, sul teme dal “amont” e al è pardabon un bile risultât, daspò di vot mes di gare. E prime di pandi i risultâts, noaltris de Ostarie no podìn fâ altri che ringraciâ ducj chei che nus àn dât cheste sodisfazion ogni mês, cence stufâsi.

Ve chi alore, la classifiche dal mês di Avost:

Une vore ce dî, su cheste classifiche. Ancje se magari dai numar no si viôt, us spiin che pe prime volte i trê de zurie a son stâts pôc dacuardi, cun guscj une vore diferents, che a àn premiât, ae fin, la conte che ur è plasude a ducj. “Apis mellifera“, un toc di mareose fantascience sociâl dal Borussia Dordul, cuntun vantaç consistent, e à fat fûr ducj i aversaris, rivant prime devant di une des sorpresis dal mês, il Barba Pisul Stentadizza, che cui siei romantics “Gjespui” al à pardabon ben figurât. E daûr di lôr, a cheste tornade, altris dôs sorpresis: il Copasse Blu, che al à vinçût ancje il premi dal public, al è rivât tierç cu la conte “Il ros e il neri“, e il Scalembrut al à tirât fûr dal cjapiel un toc costruît suntune idee fuarte come “Rispristinamont“. Il prins doi de classifiche, il Reâl Cocâl e il Cjicechepicjedispicjelacite a àn tirât un pôc flât, permetint a scuadris come il Volketitrai-Liga e il Lupusinfabula di svicinâsi.

Anìn alore al viodi il Fantacorsecurte, dulà che ancje chest mês il public al è stât une vore diferent, intai siei judizis. Daûr dal Copasse Blu, difat, a son rivadis ben dôs contis, Imbrunî… ment, dal Argo Patùs e Emozions di Poesie, dal Gjaline Padovane, e ducj i trê a àn vuadagnât cualchi posizion cun chescj ponts. Ma al va dit che une altre grampe di contis e à cjapât vôts.

La classifiche dai scometidôrs e je duncje cheste:

Si conferme in teste Noemi Salva, che e à cedût alc al secont, Nene, e che insieme cun Rosute Pelote e pâr rivâ pardabon a brincâ lis contis miôr. Ma ancje chi, la vitore e je ancjemò lontane, parcè o savìn che al baste un pas fals e il cjâf de classifiche al pues cambiâ.

Ma rivin duncje ae classifiche finâl gjenerâl dopo la otave zornade di campionât, ven a stâi a 2/3 dal campionât. Vele chi:

Nol somee cambiât masse, e pûr, chest mês, al à cambiât une vore. La teste e je inmò salde al Cjicechepicjedispicjelacite, ma daûr cumò o cjatìn il Borussia Dordul, che al à sorpassât il Real Cocâl. Cun di plui, si pues dî che salvo sopresis o mancjadis consegnis de conte, tirant dentri ancje il Volketitrei-Liga, a saran chescj ca a zuiâsi la competizion.

Daûr, in zone Europa League, disìn, al sta pardabon sucedint di dut. Atletic Gjatui, Copasse Blu, Sbreghebalon, Lupusinfabula e Barba Pisul Stentadizza a son intune grampe di ponts e ducj a àn dimostrât che a puedin tirâ fûr il toc che al fâs la diference. Dopo la classifiche e devente plui sgranade, ma ancje ca si cjate contis che a si metin cence fastidi in competizion cu lis primis, come che al è capitât chest mês.

La robe plui interessante però e je la classifiche par designâ il campion d’Istât, stant che al mancje dome il mês di Setembar, a teme “Imprescj” e a son in cinc tor i 40 ponts: Cjicechepicjedispicjelacite, Borussia Dordul (42), Volketitrei-Liga, Lupusinfabula e Copasse Blu. Ducj chei ca a puedin deventâ campions di Stagjon! Viodarin cemût che si compuartin a Setembar.

E intant che o spietìn lis lôr contis… buine scriture a ducj!