CorseCurteAvost#11 – Ripristinamont

#10 – Ripristinamont

Di plui di vincj agns che la sience e podeve predî la ore juste che ogni un al sarès lât in chel altri mont.  E veve rivât pardabon a strolegâ il dì e la ore precise di studament e fin cumò no veve falât nancje une volte.
Daûr di ogni nassince, par leç,  si scugnive informâ e fâ publiche la ore di sierâ i voi di ogni citadin, e cheste e vignive stampade su la cjarte di identitât. In gracie di cheste informazion si cognosseve il numar di popolazion mondiâl in ogni moment, il Guvier al rivave a calcolâ i dibisugnis dai abitants e la int e cumbinave di lassâ dut in ordin prime di partî inmò di dî adiu ai siei cjârs.
Bot e sclop cheste suaze e someave jessisi disjustade, ducj cuancj a nassevin e a cjapavin la stesse date di partence, di precîs ai 21 di Dicembar dal 2073 aes 6:23 sot sere.
A sbreghebalon la gnove si sparniçà ator pal mont. Intun prin moment al dave la idee di jessi dome une coincidence, par il contrari, ogni nassite une daspò chê altre, e confermave la stesse drete. Si spietave pardabon che al fos un erôr di procès dal program, sì che duncje si domandà ae sience une verifiche. La rispueste e fo lapidarie, nissun svari, dut confermât. Cundiplui i sienziâts a rivarin ancje ae conclusion che nissune persone e veve une date di muart plui inlà di chel dì.
Magari cussì no al jere clâr che l´amont de umanitât pe prime volte al jere ciert, ca di pôc i nemâi a saressin tornâts a paronâ il mont tant che une volte.
Cuant che a mancjavin pôcs agns pal epilic e ducj cuancj a vevin acetât cheste teorie, si produsè une prime nassite cuntune date di partence divierse. E jere la prime plui inlà di chel dì, e cussì vie une daspò chê altre a confermarin cheste tindince.
Alore mo al jere clâr che il 21 di Dicembar dal 2073 nol jere segnât tant che l´amont de umanitât, dome che la nature pardabon stufe dai oms e metè in pîts un ripristinament cu la sperance di un cambiament.

di ***
#1***

1 coments On CorseCurteAvost#11 – Ripristinamont

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît