CorseCurteAvost#20 – Gjespui

#20 – Gjespui

Neri.

Dut al è neri.

No sint nuie. Come se il cuarp al fos dut indurmidît… Smavît…

Ancje il cjâf è dut sconfusionât, come pierdût inta chel neri fat di nuie. Come se la ment si fos sfantade tal vueit.

O cîr di… no sai a dî. Tornâ a meti dongje lis partiselis de mê cussience, forsi. Di sconcentrâmi, e provâ a scoltâ.

Cumò o sint alc.

Il gno respîr, lizêr.

Il gno cûr, tremolant.

Un ricuart svoladi ma vîf come un insium mi tontone. Mi stice a vierzi i voi.

O scuen fâmi fuarce par tirâmi fûr di chel grant vueit neri.

O vierç lis palpieris in sfese e o cjali in jù… Ma o torni a sierâ i voi daurman, biel che il gno respîr e il bati dal gno cûr a si sveltissin dibot.

Chel che o ai smicjât al è bastât par confermâ chel che o vevi timôr.

Il cret… il sanc…lis gjambis in chê posizion inaturâl…

O soi colade jù dal troi.

Cheste realizazion mi slache tal pet tant che un masegn.

O cîr di calmâmi, di guviernâ il respîr… e di fâmi cûr par tornâ a vierzi i voi. Fuarce!

O vierç i voi e o doi une buine voglade. Lungje, analitiche.

O pensi che o somei a une pipine snodabile rote. Ce raze di pinsîrs intun moment cussì.

A ogni mût, mi è plui che clâr che no pues fâ nuie.

No pues alçâmi.

No pues movimi.

Gjo, no sai nancje cemût che o fâs a jessi vive, in cheste condizion.

Une gnove realizazion mi cjape: o soi daûr a murî. E no pues fâ nuie.

O restarai su cheste mont par simpri.

Però… o sint une strane sensazion di maravee, di sorprese.

Cheste realizazion, inpen di disdrumâmi sot dal so pês… mi slizerìs.

O volti il cjâf e o vierç i voi.

In bande di me, dute la schirie des monts che o ai rimpinadis e amadis te vite, inluminadis de miezeombre dal imbrunî. Lis cognòs une par une.

O torni a dîmi: o restarai su cheste mont par simpri.

Ce biel.

Ce pâs.

Ce sium.

E biel che il soreli al va planc a planc amont intune sflamiade cidine che e bruse l’orizont, ancje jo o sieri i voi su lis mês monts.

di Enrico Tomasi (Barba Pisul Stentadizza)
#1354