CorseCurteAvost#01 – Il ros e il neri

#01 – Il ros e il neri

No si impensave cuant o cui, ma i vevin dite che il ros dal imbrunî al jere segn di sanc. Sanc di cualchidun copât. I plaseve cetant cjalâ il cîl che si scurive passant dal celest al viole e daspò al colôr di rose e al ros cence nissune logjiche. “Dal celest al ros… cemût?” No si dave pâs.
Si jere sentât denant di cjase come ogni dì. Il scjafoiaç al tignive la int dentri ma lui al veve bisugne di sintî i vues cjalts, la medole movisi biel planc e traspuartâ la linfe ator par chel cuarp sec, ingrisignît da la ploie e dal frêt. Su la cjadree dispès si indurmidive, la bocje spalancade, il cjâf butât indaûr, il cuel ufiert al aiar bulint. Nene lu varès clamât a cene no prime da lis vot, un moment regalât, dut par lui.
I colôrs si jerin ingrumâts tal cîl dai soi siums, come nûi fofs e disordenâts. E cence preavîs, il celest a veve tacât a scombati insiemi cun il viole e il neri, ma di front a vevin cjatât la leghe dai narancins e dai rose. I nui colorâts a si jerin ingredeâts, fûr par fûr, incrosâts e intiessûts come se a fossin stâts fîi di gucje. “Indulà sono i ros?” si domandave intal sium, “Il ros al è un colôr primari, nol pues deventâ…”
Intant, di bot, ator de sô cjadree e jere colade la ombrene di une gnot impenzide. I scûrs des cjasis a vevin sbatût sot di un aiar rabiôs. I uciei a vevin finît di cjantâ e a svolavin cence regule viers il bosc.
Une sacume scure e veve traviersade la strade, lizere come il polvar, svelte come il pinsîr. Intal sium si jere slargjade une magle rosse e penze, no un fîl come chei altris, ma come une tacule invueleade.
“Al è pront!” Nene si jere presentade su la puarte. Il so om non si jere mot, no une peraule. Lu veve scjassât par lis spalis. Il berghel al jere sbrocât de pôre. Une rie lungje i coreve sot dal cuel, di une orele a che altre. E in tal cîl parsore un fîl grues e plen al veve piturât chel imbrunî di ros.

di ***
#1***

1 coments On CorseCurteAvost#01 – Il ros e il neri

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît