Codroip, ai 22 di Març dal 2024
Sala Abaco
E je vere che par cui che al jere a la GRUESSE sorprese no jere une novitât, ma al reste che dal mês di Zenâr, cuant che o vin pandût la gnove, no vevin mai presentât in maniere uficiâl il nestri libri, a non Contecurte, La Stagjon des Contis.
E insome, al coventave propite un puest di gale e un clima di pocje voie di fâ, par ofrî une biele performance al nestri public, aromai usât a no viodi presentazions di libri ordinaris.
E al è stât propit cussì.
Te serade di vinars, li de Sale Abaco, in gracie dal jutori di Pierina, che no dome e je deventade une contecurtare di gale, ma nus dà simpri une man cuant che si trate di meti adun events impuartants, o vin presentât il libri. E lu vin fat sielzint 6 contis dai prins 6 classificâts ae CorseCurte22, la gare di contis curtis che e dure un an. Ma l’Ostîr che al è un bintar, nol à mighe let lis contis cjolintlis dal libri… ma ce! Al à cjoltis altris 6, tant par dâ une cerce ancje di chês che no son jentradis tal libri ma a varessin podût. E no je finide ca, parcè che no dome lis contis de CorseCurte a son stadis tiradis dentri. In gracie de presince dal nestri aromai fidât Peteçon de Ostarie (Alessio) al à let tre grampadis di Ontecurtutis, lis contis che si intachin intor tant che une magle di vueli, ancje se di bon a àn che spes ti gjavin vie une ridade.
E cun di plui, par sielzilis, i à pensât il public, cuntun sorteç fat de gjatemarangule che al permeteve parfin di vê un scont di cualchi centesim se si cjoleve il libri… Il plui alt al jere di 45 centesims, stant che lis ontecurtutis a jerin 45. Ma po, cuissà parcè, cuasi nissun al à profitât… va là a capî la int!
Ma tornant a la serade, i letôrs a jerin il solit Famei Checo, la simpri presinte Sartore Astrid, il nestri Muinifotograf Stiefin e il Mestri Zuanluche. Lis contis letis a jerin di Astrid Virili, Alessandro Valoppi, Laurin Zuan Nardin, Rudy Citòs, Margarite Cogoj e Serena Fogolini e il biel al jere che a jerin dutis diferentis. L’Ostîr, come simpri, al à menât zarde presentant cence tantis cerimoniis, scherçant cu la assessore Silvia Polo, contant alc dal libri e de CorseCurte e fasint divertî il public cu la leture des Ontecurtutis, che o cjatâis su Instagram. Ce altri? A son rivadis colombis (di mangjâ), salam (di cjocolate) e confets (di lauree) e parfin un tai e dôs cjacaris, ancje se la serade e je stade curte e svelte.
