#22 – Il colôr dal an

Eline.
E. Li. Ne.
Elare rimpinade tal gno cûr.
Limpie come un riul a pene disglaçât.
Nevâl di montagne la tô piel blancje. Eline.
Mi impensi chel dì di Primevere, cuant che la tô cotule e balave tal aiarin di Avrîl, e tu ziravis par fâ la ruede cul vistît gnûf: celest, di rase, cu lis maniis a buf. Jo ti cjalavi traviers de cise: “Âstu viodût ce biel? Mal à fat mê mari par domenie che o larìn a gnocis, jo o ai di fâ di damisele di onôr!”
E in chel il gno curisin, chel di un frut che nol veve albe di ce che al fos l’amôr, si è sbusât fûr par fûr, inmagât di chel celest balarin.
O zuiavin insiemi tantis voltis: a saltâ il fossâl o a fâ cori barcjutis te aghe, e tu tu ridevis, ma dopo al rivave Sandri e al diseve “Zuìn di platâsi! Al sta sot Berto!” e cuant che o vevi finît di contâ, no us cjatavi plui nissun dai doi.
Al someave un amôr impussibil il gno, Eline, fin a chê gjite in montagne, fate a sedis agns cu la compagnie dal oratori, cuant che si sin sentâts insom de coriere e o vin ridût dut il timp cjolint vie la tô amie Lussie, che e veve la muse rosse e scotade come un gjambar bulît. E intant che chei altris si rimpinavin su pal troi nô o sin restâts indaûr, e o ai viodût un nûl blanc spieglâsi tai tiei voi, e ti ai cjapade par man e mi someave un sium.
Tornâts de gjite, al mancjave pôc a la fieste d’Istât te vecje latarie bandonade: cul grup dai amîs le vevin furnide di bancjis, cjadenis di lusutis e cassis pe musiche. O vevin parfin cjatât il deejay, Eline, e jo ti vevi invidade, ma invezit tu âs dit cussì: “Mi tocje lâ cui miei là di mê none che e fâs i agns, propit une barbe, ma no rivi a vignî a la fieste!”
O jeri cussì avilît che no ai volût lâ nancje jo… Ma ti pensavi cussì fuart, Eline, che o soi lât bande dal fossâl, juste daûr de latarie. E là, sot di un morâr, o ai viodût lui, Sandri, a bracecuel cuntune zovine, te miezeombre no si capive cui che e fos. Lis lûs coloradis a imbroin, si sa, duncje no soi sigûr che il vistît al fos propit celest. E po chest an il celest al va di mode, al è une vore comun, anzit mi àn dit che al è il colôr dal an.

di Stralunade (Atletic Gjatui)
#1226