Un spetacul par fruts… ft. Lupo Manarie

TU MI COVENTIS!

TU! Sì, propit tu, contecurtâr che tu fasis fente di nuie… Ma magari no propite tu. Ma to fi, o tô gnece, o to nevôt, o chel fi dal to amì che tu sâs che i plâs scrivi storiutis. Anzit… a jessi precîs, a coventais a LUPO MANARIE! 

Eh, sì, che ta chestis imagjins al è propit lui, che al à cirût di dissegnâsi, (cence masse sucès, parcè che al à dite che lui al è plui biel), cu la inteligjence artificiâl, par spiâti la gnove e dîti I WANT YOU, a la furlane!

Cuale gnove? Ma… UNE GNOVE GALATICHE!!! 

Vinars ai 29 di Dicembar, tal daspò misdì, o vês di tignîsi libars, parcè che noaltris di Contecurte o vin voie di meti in pîts… UN SPETACUL PAR FRUTS! E al somee che al sarà propit Lupo Manarie in persone a jessi presint a presentâ l’event… o almancul cussì nus à garantît.

E alore, cjar contecurtâr che tu sês in scolte, se tu âs voie di proponinus une storiute curte curte par fruts, ve chi, mandile, che se je biele la leiarin in cheste serade! E se tu sês un frut, ancjemò miôr. Cemût dîtu? Tu sês un frut ma no tu sês bon di scrivile par furlan? Nissun fastidi! Fevelistu furlan? E alore tu sês a puest, scrivile come che tu fevelis e dopo al pensarà ben l’Ostîr a judâti a comedâle. E se propite no tu sâs il furlan… va ben ancje par talian, o par inglês, o par eschimês… Dai, dai… ce spietaiso. Fasêt zirâ ator cheste gnove, che o vin voie di puartâ i fruts in Ostarie.

Cemût dîstu? Ce tipo di conte? Ma al è compagn! Une flabe, une storiute, une conte di fantasie o di superfantasie o adiriture di supermegaiperfantasie! Baste che fâsi divertî i fruts che le scoltin.  Cemût dîtu? Tu sês un frut, tu varessis voie di provâ a scrivi alc, ma ti mancje la ispirazion? Nissune pôre!

Lupo Manarie al à pensât ben di dânus cualchi imagjin che al à fate lui par ispirâsi… Lis metìn ca sot. Un pôc scalembris, lu savin, ma… bon, lu savês che Lupo Manarie al è un pôc fûr cu la cassele, e alore a son saltadis fûr chês ca. Ma insome… viodêt voaltris… L’impuartant al è che si segnedis la date e che in curt e rivarà la locandine cui detais. Ma intant, stant che di contis par fruts, inte Ostarie, no vin tantis, us fasin la clamade. E al sarès ancjemò plui biel vê cualchi conte DI fruts.

E se no savês cui che al è LUPO MANARIE… fracait a chi che o podês lei lis sôs aventuris, e dal sigûr cualchidune la leiarin ai 29.

O pûr achì o podês scjamâ un model cul truc par scrivi une conte curte

E alore… VIE! SCRIVEIT! Lupo Manarie al è une vore seneôs di tamesâ lis vuestris storiis!

2 comments