Scrivìn une conte!

Se cualchidun dai contecurtârs al à cucât su la nestre pagjine fb al varà viodût che setemane passade l’Ostîr e la Coghe a son lâts in mission par cont di Vôs de Basse e Contecurte. E a son lât a finîle nuiemancul che tal mieç dai fruts des scuelis mediis di Prissinins e Cjarlins.

L’obietîf al è subit dit: o vevin voie di stabilî un recort di scriture in contemporanee di contis par furlan, cundiplui doprant frutats che no simpri a fevelin furlan e cuasi mai a lu scrivin.

Us disin che e je lade ben, e se no altri si sin divertûts ducj e a son saltadis fûr une vore di storiis. E une buine man a la robe e je stade une sorte di “Manuâl di istruzions” par scrivi une storie che in vuestri Ostîr al veve preparât.

Aromai al mancje pocjissim a la scjadince dal concors e no si sa mai che cualchidun – tal puest de tombule – al vedi voie di provâ a scrivi une conte par furlan a mandâle, magari di fâle scrivi ai fruts. Intant ve chi sot la schirie di istruzions che a permetin di SCRIVI UN CONTE!

E ve chi il link cul bant di concors di Vôs de basse

CUI ISAL IL NESTRI EROI?
Sielzi un biel non!  ________________ 
e al è un/une ___________ (Persone? Bestie? Ogjet? Creature de fantasie? No si spie!)

E CE STAIAL FASINT?
Alc che e al sta fasint il nestri eroi, une azion che al fâs simpri. A bastin une frase o dôs, che nus fasin capî cui che o vin di front. Si conte alc che al fâs dispes, o di particolâr, lis robis che al fâs nus mostrin cui che al è.

CEMÛT ISAL FAT?
Al è biel imagjinâ il protagonist, ma par stiçâ la fantasie bisugne descrivilu. Si pues contâ dal so aspiet, si pues dî a ce che al somee. Nol covente tant, se si sielç lis peraulis justis a bastin pocjis.

DULÀ SINO? E CUN CUI?
I vûl mostrât il puest dulà che e scomence la storie, al è biel savê dulà che si è, e ancje se al è cualchidun altri dentri ta cheste storie Cuissà, a puedin jessi altris che a deventaràn amîs e aleâts.

BUM! AL SUCÊT ALC!
Al sucêt alc! Cussì, di bot. Alc che nissun si spiete. Ta ogni storie al sucêt alc, cussì come che nus capite a nô, ogni dî. E ta lis storiis che nus plasin, al è biel che al sucedi alc di impuartant.

E CUMÒ?
Bisugne pensâ a ce fâ. Il nestri Eroi forsit nol sa ce fâ, ma al vûl fâ alc. Nol è simpri facil sielzi ce che bisugne fâ, e bisugne ancje cjatâ il coraç. Cualchi volte i vûl domandât a cualchidun che al sa, o pûr cjatât cualchi amì.

L’EROI AL PARTÌS PE AVENTURE!
Bisugne prime preparâsi, par une aventure, e par solit si fâs fature. Ma partî par une aventure al è simpri biel. Si spere che lis robis a ledin ben. Il viaç al pues jessi lunc o curt, divertent o dificil, ma a la fin si rive.

AL FRONTE IL NEMÌ…
In dutis lis storiis plui bielis che o cognossìn o che nus àn contât al è simpri un moment dulà che e salte fûr une vuere, une bataie, une discussion o insome, un scuintri cul nemî. Al pues sucedi di dut… Magari il nemì al è plui fuart, o al è un altri, o nol è nancje un nemì.
Al è biel ancje che i personaçs, sedi dilunc dal viaç, sei tal scrintri, a si fevelin

AL VINÇ, AL PIERT O AL PAREGJE
In cualchi maniere la nestre storie e à di finî. Si pues sielzi di fâle finî ben par ducj o dome par cualchidun. O pûr si pues lassâle sospindude, che ognidun al pensi ce che i va.

E AL TORNE CJASE CUN ALC
In ogni câs il nestri Eroi no dome al torne cjase, ma al à ancje vût alc. Al pues sedi un premi o une sodisfazion, o l’amôr, o la felicitât, o il svindic o pûr ancje alc che al à imparât. Il nestri Eroi al sarà diferent.

di Rafaêl Serafin