CorseCurte – La Classifiche di Jugn

O sin ai 16 e îr il nestri ultin de zurie al à votât e o sin perfet cui timps par pandi la Classifiche dal mês di Jugn, il vincidôr dal FantaCorseCurte de Vierte e ancje il Campion de Vierte.

E o podìn bielzâ dîus che a no son stadis masse sorpresis e che la CorseCurte si sta spacant in cuatri tocs, ducj interessants di seguî.

Ma come simpri, tachìn de ultime zornade di campionât, chê dal mês di Jugn. Come che o savês, il teme al jere un teme une vore gjeneric ma ancje une vore dificil, stant che si podeve intindi in maniere reâl, o simboliche, o filosofiche… insome, si fevelave di TIMP.

Us metin subite chi sot la classifiche par il mês di Jugn e dopo o fasìn ancje un coment.

Insome… l’Atletic Gjatui si è gjavât une biele sodisfazion, jessint che al è risultât il miôr de zornade e che al à interpretât il teme intune maniere oniriche e origjinâl, ma ancje une vore poetiche e reâl. Ben fate! Doi su trê de zurie le àn metude come miôr conte e il public (une vore di pocjis votazions chest mês) i à dât i trê ponts dal secont puest.

I cuatri che a vegnin daûr, aromai, a son lis scuadris che a son stabilis in zone Champions, stant che zire volte a rivin simpri a poiâ une conte convincente, cui cirint il pathos (Come il Cjicechepicjedispicjelacite e il Real Cocâl) cui cirint il mont de fantasie (come il Volketitrai-Liga e il Borussia Dordul)

A ducj chescj cinc no si pues che bati lis mans, ancje parcè che a jerin lôr a zuiâsi il titul di Campion di Vierte e a àn fat onôr ae ultime zornade cun bielis contis, che us invidin a lei.

Ma subit daûr, par la zornade di Jugn, cualchi sorpresute e je. Une buine prestazion dal Gjaline Padovane, tant par scomençâ, che e je lade a poiasi propite a schene dai top-five, e un piçul passaç a vueit dal Sbreghebalon, simpri a alts nivei, ma che al lasse cualchi pontut par strade. E simpri chi ator, cuistion di pocjissims ponts, a navighin ancje il Vecjo Claes, il Barba Pisul Stentadizza e il Sporting Brugnul, trê scuadris che a stan fasint un campionât regolâr, e che in cheste maniere a si stan gjavant lis lôr sodisfazions. E il stes si pues dî dal Copasse Blu, che par chest mês e à metût sul plat une conte ironiche, invezit di chês plui impegnadis, ancje lui al à pierdût cualchi pont par strade.

Ma viodìn di viodi la classifiche gjenerâl, che se o lais daûr de nestre MARAVEOSE PAGJINE DEDIADE o vês bielzà intivât ce che al è sucedût.

Vele chi!

Insome… Fasint i stes ponts dal Invier, il Cjicechepicjedispicjelacite al concuiste ancje il titul di Campion di Vierte, distacant di dome trê ponts – pocjissim – il Real Cocâl, che i tocje contentâsi ancje chest colp dal secont pues, sedi pe Vierte, sedi pe Classifiche gjenerâl. Al tierç puest, ancje chi, sedi de Vierte, sedi de classifiche gjenerâl, o cjatin il Borussia Dordul, e insome… O vin trê di lôr che o vin za capît che ur tocje dâsi bataie fin ae fin, parcè che un mês di mancul e la cjapin inta chel puest.

Ma us disevin che cjalant la classifiche gjenerâl, e je sclapade in cuatri tocs. Il prin al è chel di chei che si zuin la zone Champions, e a àn bielzâ totalizât plui di cient ponts. Dongje dai prins trê o vin dôs scuadris in fuarte ascese: il Volketitrai-Liga e l’Atletic Gjatui, che al pâr che a vedin cjatât une lôr dimension e a regalin simpri prestazions di alt nivel. A chei devant ur tocje sta une vore atents. E dongje di chescj, ancje il Sbreghebalon al mostrât di jessi scuadre di raze e vê i numars par fâ fûr ducj.

La seconde part de classifiche e je chê che si zuie la Europa League. A chi o vin sîs scuadri che a àn un andament cui altalenant, di alt e bas (il Copasse Blu, il Lupusinfabula, Passarute), cui regolâr, inte medie (come il Vecjo Claes, il Sporting Brugnul o il Barba Pisul Stentadizza). Ancje chescj, a son intune grampe di ponts, e o sin a metât dal campionât e ur bastin un pâr di prestazions buinis di file par tacâ a cori daûr a chei denant.

Dopo o vin une part di classifiche che e vîf inte trancuilitât. Scuadris che ogni tant a tirin il flât, ogni tant a molin jù une conte che e scjasse, ogni tant no. Ancje chi i ponts a son une vore dongje e il Scalembrut, il Tapioca City, il Rosute Pelote, il Motoguzzi, il Gjaline Padoane e il Sicheduncje a son ducj li, a zuiasale e a cjalâsi di chei daûr.

Eh sì, parcè che inte zone basse de classifiche al è casin! Il Cuelalt e il Diletant in sbandament, jentrâts in gare tart, a stan vignint sù come un fusets, e lassant stâ lis scuadris che a no abadin ae classifiche come il Potonzio o il Fi di Marie dal Cafè, e ches che aromai a parin vê bandonât la competizion, chês altri di sigure no vuelin fâ brute figure.

Insome… o sin a mieze competizion e al pues capitâ pardabon di dut, soredut parcè che si sa, al è simpri il risi di fâ un zero.

Come che al è sucedût intal FantaCorseCurte! A chi sì che o vin gnovis. Lussian, cul so passaç a vueit dal mês passât, al à lassât vie libare a Noemi Salva, che si è gjavât la sodisfazion di jessi prin inte classifiche de Vierte. E no dome cheste scuadre e à vuadagnât posizions. O vin vût doi zeros di chei che a contin: il Volketitrai-Liga e l’Atletic Gjatui no àn votât e altris a àn profitât scalant la classifiche. Vele chi!

Insome… al è dut, par chest mês di Jugn. O cjapìn la ocasion par ringraciâ ducj chei che a stan partecipant, intune maniere o ta chê altre. La CorseCurte e va indevant!