La Lotarie di Cjadalan

Us vin saludât cu la ultime Conte dal Mês la setemane passade e o vin dât a ducj i iscrits te liste la pussibilitât di recuperâ lis contis dal mês vieris. Ur vin regalât un pôcs di dissens di Krampus, ma no sin ancjemò stufs di fâ regâi!
Sì, parcè che Nadâl si svicine, e ches 2020 disgraciât al è dongje a tirâ i sghirets, si che duncje, o vin voie propite di dâi un biel sburt e sierâ cuntune ultime fieste: LA LOTARIE DI CJADALAN di Contecurte!
O vin vût la poie de cjase editore KappaVu, e induvinait ce premis che si vincin te nestre Lotarie? Ma libris! Anzit… Libris di Contis Curtis! Ma no, ancjemò miôr… Libris di Contis Curtis par Furlan!!! E alore veju chi, i premis de nestre Lotarie:

• Contis di Famee, il prin libri dal vuestri fidât Ostîr
• Cun altris voi, dal nestri Garzon de Ostarie Gianfranco Pellegrini, fresc vincidôr di Vôs de Basse e ancje (gnove frescje di zornade) secont classificât al premi Catarine Percude
• Disvuedant il scansel, ultin libri dal nestri maraveôs Famei Checo Tam
  Altris contis di famee, ven a stâi il sequel dal prin libri dal vuestri OStîr.
• Ses e barete, un librut di contis ironichis e cuasi vietadis a plui piçui de nestre contecurtare Francesca Gregoricchio!
• Scûr di lune, un dai prins libris dal nestri super Famei Checo Tam

I nestris Piçui Aiutants di Contecurte a son za in vore a preparâ biliets e bussulots di meti tal zei pe estrazion. La date che o vin sielzude e je la zornade colôr naranç dal 29 di Dicembar, tor 7 sot sere, e o podarês viodi la estrazion in direte su la nestre pagjine Facebook!
Insome… no us reste che spietâ la sere dal 24 par vê i auguris di Contecurte, cjapâ la vuestre tredicesime e savê cuâl che al è il vuestri numar pe Lotarie di Cjadalan.  Al baste jessi iscrits te nestre Liste di Contecurte! (e o sês inmò in timp!)
E se o vês voie di vê plui pussibilitâts di vinci… fasêt iscrivi cualchi amì prin de sere de Vilie  e dopo i robais il premi!
Spesseait! Al mancje pôc!

1 comment