LCPBDM #2.1 – Balâ di bessole

Trop isal biel balâ di bessole?
No si pues dî che tu tal sedis domandât. A une cierte etât, che si strucje dai sedis e a va a colâ parsore dai disesiet o ancje alc di plui, no si pues propite dî che tu ti fasis pardabon lis domandis. A chê etât alì, lis domandis a son za la rispueste. E jessi cjase di bessole, cuant che tu âs finît di fâ i compits, cuant che tu sâs che i tiei a son vie e a tornaran dal sigûr inte sere, cuant che tu âs di sielzi ce metiti usgnot che tu vâs fûr cu lis amiis, e cumò tu sês libare di saltâ di ca e di là par dute la cjase, cence vergognâti e cuntun volum che se al fos cjase to pari tu varessis za sintût cuatri porcos e magari cuinçâts di une menace di scufiots… eco, ve li. La domande che tu ti fasis e je za la rispueste.

Trop isal biel balâ di bessole?
Soredut se ce che tu scoltis al è alc di diferent di ce che a scoltin ducj i tiei amîs. Parcè che tu, no sêstu diferente di ducj chei altris? E tu no tu sâs che a chê etât li si sintisi ducj diferents, ducj mâl capîts, ducj di une altre bande, intun altri planet, intune altre dimension… ancje se dopo, stant che ducj si pense cussì, tu vâs a finîle come ducj de stesse bande, tal stes planet, inte stesse dimension… ma cheste robe tu la capissarâs dome ca di cualchi an. Come ducj.

sillysaucysocks

Par cumò ti baste cjatâ alc che ti confermi che tu sês diferente.
E che ti fâsi balâ. Alçâ i braçs, saltâ sul jet, strissinâ i pîts tant che faliscjis… e al capite che a fuarce di fâ un skip, e un altri skip, e un altri skip, su la tô playlist di ducj i tocs gnûfs, al rive un che al tache propit come te, come che tu ti sintis cumò, cuntune vôs di femine, par altri. E tu capissis in chel moment… in chê prime volte che tu le scoltis, che cheste cjançon, dulà che jê e dîs Daa da da da… che dome tu tu rivis a intivâ trop biele che e je chê maniere li di dîlu, pronunziâ chês dôs letaris… e tu intivis che la cjançon no je dome biele, ma la plui biele.

E tu vâs indevant a balâ, la cjançon plui biele dal mont!

WAITED ALL NIGHT, Jamie XX, In waves [2023] 3’28”

JAMIE XX al è chel che al da il non ai XX. Al è un dj e produtôr di Londre. E i The XX ju à tirâts dongje cuntune femine e cuntun om, Romy e Oliver, ducj i doi cu la vôs une vore melodiche, che tu cognossis daurman, e che e rive soredut sui tocs plui tenars. Ma Jamie XX al è soredut un che i plâs fâ balâ la int. E ta chest 2024, dopo un biel pôc di spiete, al è jessût cul gnûf disc, IN WAVES, e intune cjançon, une sole, al à clamât dongje i siei colegas dai XX, a cjantâ mieze cjançon. E ancje se a ‘nt saran milante, cjantis che a disin lis peraulis “waited all night”, come che lu dîs Romy, intal ritornel, che al è ancje il titul dal toc, al vâl di bessôl la pene di vê scoltade la cjançon. E se un al dîs che la cjante no lu à fat balâ… e je une bale.

2 comments