Onorine, passade le cincuantine, no jere plui mestre di nuie daspó che i vevin puartât vie le scuele cun dutis lis cjasis, par fâ passâ un tren tal stradon dal paîs. Cussí a passave il timp sentade tal banc sot dal condomini o sù te sô cjamare al cuart plan sui dominis dal web. In chê dí, le Onorine, onorade pe visite di agne Lene, a voleve fâi sintî i aas e i oos che a vignivin fûr dal mûr tant che le vicine, onorade dal so morôs, a faseve l’amôr. Di lí a é vignude fûr une storie che ae ore dal cafè, agne Lene e siervis cul tè a dutis lis comâris de Cjargne e a conte… Ch’a no rivavan nencja a durmî. E che sentadas sul banc sot di cjasa, la Gjip dal murôs sot dal nâs, che folc lu possa ardi, signôr, ur taponava la vista como di sôra ur taponavant la voia di durmî. Daspó, las gomas di chê Gjip a erant cussí duras ch’a no eran rivadas a sbusâias. Alora, a era lada a fâsi ridi in farmacia. Ce volevia fâ cun chei preservatîfs ae sô etât? Segretamentri, a veva chê di fâ alc d’interdet como ch’a veva viodût su internet cula Onorina, e dopo cualchi prova, una sera a vevant spietât ch’al rivi chel da Gjip, ch’al passi sot dal barcon e op, a vevin molât jù un goldon jemplât di 10 litros di aga, po svueltas svueltas a erant corudas jù a fenzi di tornâ da messa. Ma alà jù, la bomba di âga a veva copât un altri om! Panicadas a jerant tornadas sù strucjant le vicina che se nol fos che a i veva insegnât a doprâ l’ordenadôr a sarès una bruta sdrondina patentada. Lí, agne Lene e tirave il flât, e beveve un flât di tè, po a continave a contâ che cjalant pal barcon a vevant viodût un ispetôr ch’al cjalava sù da lôr. Joissus, al veva indovinât dut! Alora a si jerant bussadas vaint, a vevant fat las rôsas, bagnât las valîs e cula gabia dal canarin e las valîs bagnadas a jerant ladas jù a confessâ che chel om, a no volevant copâlu. Lôr a volevant domo fâ pôra a chel slavrât di murôs ch’al meteva simpri la so Gjip devant dal lôr banc e che se vessin volût copâlu a varessin metût 15 litros invezit di 5… Insomas, di chê dí, il murôs al meteva la Gjip da pé da strada e ogni setemana al puartava a la Onorina o rôsas o bonbons e a part il jet ch’al uica, cumó scuâsit a no si sint plui ni aas ni oos.
Vualtris o disarês che in prason a si podarès puartâ ancje alc di plui ma l’ispetôr, savude le storie al jere sclopât a ridi. Po al veve arestât il bandît che al jere dome svignût e al veve dite al morôs che, Agne Lene e le Onorine, cuant che an viodût chel lari butâsi su di lui cule curtisse, a vevin butât ju il goldon di aghe che dopravin par bagnâ lis rôsis dal barcon e… i vevin salvât le vite.
di Jaio Furlanâr
#190
3 comments On Dai aas ai oos
Il cjargnel, prime di dut, mi plas sintilu fevelà fintremai di cuanc che in val Pesarine mi soi… ma ancje leilu par cori daur ae so cantilene. E duncje, Jaio, ti voti "mi plas" dos voltis.
E tant pa no smentimi… ma satu che propit doi dìs fa o ai menat pal boro une vore di int in Internet cun tun asin di fortune mascarat da lint, metut dentri un minestron che…
Mandi, emigrant di inomeance!
Plasê di plasêti Frank Spada. Il fevelâ dai cjargniei de val Pesarine al é unic. Fortune che a lassù a restin zenuins. Forsit par vie che le val no si dopre par lâ di nissune altre bande.
O vevi chê di dâmi un Mah come par disi che il cjargniel no lu ai inventât jo, ma cualchidun al mi à votât prime:-)
Satu Jaio, second me, in val Pesarine a restin zovins, e zenuins, par vie che san menà ator i orolois solars 🙂
Mandi e prove a clicà il nom che tu mi stimis.