Udin, ai 29 di Avost dal 2024 – 20.30
Nuovo Gambrinus – Birra Store, Viâl Vât
E ce vevino di fâ se Zaraton nus domande di lâ a bevi une bire a Udin? Vûstu no contentâlu? Miôr di no, che si sa, se Zaraton si inrabie al è ce cori!
E alore ve ca, in gracie de poie de Kappa Vu, il nestri Zaraton al à cjatât il bon acet li dal Nuovo Gambrinus, cumò logât in Viâl Vât a Udin e deventât ancje BirraStore.
E di biris, là dentri, ind jere une vore, tant di clamâ dongje cuasi dute la clape di Chei Soversîfs di Contecurte par meti in sene, aromai avonde rodât, il spetacul gjavât dal libri dal Ostîr.
E di prionte, in gracie de super disponibilitât di chei dal BirraStore, no dome o vin doprât une siore sale (no cate la temperadure avostane) ma o vin vût la possibilitât di gjoldi ancje dal schermi dulà proietâ il fumut di Zaraton e cualchi altre imagjin.
E cul ostîr in plene forme (al jere dopo la tierce) o vin tignût bot ancje a cualchi piçul fastidi tecnic dilunc des leturis. Si che, cuntun Muini Stiefin aromai simpri plui mezzobusto dal TG, cuntun Famei Checo che al jere un complotist e un seguaç di Chthulhu credibilissim, e cun Astrid pardabon tal so puest a fâ la invasade religjose o la ambientaliste, la robe e je lade vie slisse come un zaraton tal Mediterani!
A judâ l’Ostîr cu lis leturis gjavadis dal libri o vevin ancje il Berlon, che al lave fûr e dentri dal cercli dal timp, e a fâ la discjockey di siglis di TG o vin doprât une gjate marangule. E se no crodês che o jerin cussì in forme, dait un cuc a lis fotografiis. Nol mancjave propit nuie… Forsit cualchidun in plui intal public, clare, ma chei che o jerin a nus son parûts ducj contents e sodisfats e alore… ae fin… o vin scugnût paiâ une bire ancje a Zaraton!
- La croniche de serade
- L’articul di presentazion de serade
- Par cjoli il libri
- Par savê di plui sul libri
