O sin ancjemò stracs e sudâts de cjalde serade di îr, al Nuovo Gambrinus (Birrastore) di Viâl Vat a Udin, ma us contìn daurman de serade e dal spetacul, che cundut dal clime une vore cjalt al è vignût ben e si sin divertûts.
No cate no masse int a viodi, po dopo, l’obietîf al jere chel di bevi une bire e di biris, sedi prin che sedi dopo il spetacul, int vin bevudis plui di une, e ancje mangjât ben, e o scomencìn cun ringraciâ chei dal Nuovo Gambrinus che a son stâts super disponibii e pronts a risolvi ducj i nestris fastidis.
A scomençâ di chei tecnologjics, stant che no pensavin di doprâ la part video, cul fumut di Zaraton e lis altris imagjins de storie, ma dopo o vevin a disposizion un super schermi e… no vûstu che no jerin bogns di doprâlu?! Par fortune che Lucagambrinus al à risolvût e ancje se a mieç spetacul Zaraton al à mandant in bloc la robe, dopo le vin cumbinade.
Ma insome… Anìn al Spetacul.
Scuadre colaudade, aromai, e spetacul compagn di chel di San Zuan, che al viodeve tornâ il Berlon a fâ il dopli cun l’Ostîr par contâ la conte di dentri, e il nestri fidât Famei che al è deventât un invasât di Chtulhu e un complotist e parfin un negazionisj. Po dopo, la Sartore e je aromai usade a fa la fanatiche religjose e il Muini – a di part rivâ cu la machine fotografiche scjamade – al è simpri in golarine par fâ il telegjornâl. A completâ la robe, o vin metût une Gjatemarangule a la consolle, a gjestî imagjins e sunôrs. L’Ostîr, si sa, aromai al conte la sô storie cence lâ masse daûr al copion…
A vierzi la serade, prudelade de cjase editore dal libri, chei de Kappa Vu a àn visât ancje come che Zaraton, in bande di sei il libri plui biel e fûr cu la cassele dal 2023, al è ancje il prin libri par furlan edit in easyreading, il font inclusîf biel di lei.
E par sierâle, us lassin cualchi fotografie (Eh, sì, il Muini al à ben ancje un telefonut che al fâs bielis fotos) che su sfont ros a son vignudis une vore adatis a la storie! Se o vês voie di viodi altris, restait in spiete dal articul inte pagjine “In cjar e vues”
