Cormons, ai 15 di Setembar dal 2023
Place Libertât
Insome… al capite che sul tacâ de Istât une tarlupule e rive a tîr dal Ostîr. E bon, chel al viôt simpri une vore di tarlupulis, o disarês voaltris. Ma invezit, cheste tarlupule ca e jere bisiache, nuiemancul che di Cormons, e i domandave se al veve voie di puartâ il Spetacul dai Quiz dai Mês inte Fieste de Ue. E insome… il nestri Ostîr al à pensât sù par jù doi o trê milesims di secont e al à dit di sì, al à domandât di mangjâ e bevi, e ve chi la serade che e je saltade fûr!
A lei i tocs di contis che a vierzevin ogni mês, nuiemancul che Tamo Franceschi, chel de cjante Ho scritto Tamo sulla sabbia, che al à inmagât (lui sì) i presincj cu lis sôs performance atoriâls. 1-2-3 vie! Prin mês cjapât sù de valete indisponente Galleria Giorgi e al ven fûr Setembar. Inutil dî che Virilia e somee une vore plui preparade, ma Franco al ten bot in fidance de strategjie “plui cool che sintiment”.
Cun di plui, o sin aromai rivâts ae cuarte puntade dal Quiz e i sfidants a vevin di jessi Virilia Astridi, za finaliste inte ultime pontade di Cjarlins, e Berto Agnule. Pecjât che cuant che la presentadore, Fogolina Sereni, lu à clamât in sene al è saltât fûr che al jere stât blocât dai siei tancj amiradôrs ator pe sagre (lis lengatis a disin che al jere cjocat intai chioscos) e insome… al è tocjât clamâ il sostitût. Par fortune che tal public, a spietâ che lu clamassin pe cueste, al jere nuiemancul che Franco Gianluchi, ancje lui espertonon di tradizions de Patrie. A judicâ lis rispuestis al è tornât il FEF Londar Micheli, che al veve za mostrât la so capacitât di stufâ incjantâ il public cul so savê.
Ma ve chi che e salte fûr la prime sorprese de serade. Tal public, vistût tant che un paiasso figurin, al è nuie mancul che il grant, innomenât, incredibil, supermâc Serafin Strolic, che al poie jù daurman un dai siei zûcs di magjie, che nol à mai falât in cuasi dusinte agns che lu met in sene. Il nestri fotograf, Stefanutto Stefani, si spele lis mans a fuarce di scatâ, intant che daûr de schene a corevin lis mountain bike. E po dopo ve, che Serafin ti invente il test par discuvierzi se chei dal public a jerin benandants o striis, e ancje ce bestie che a cjavalgjavin e ce fros che a tignivin in man intes gnots des 4 tempora.
E cussì, dopo un altri zûc fat cu la colaborazion di Dante, ancje lui in place Libertât a cjalâ il Quiz, la disfide e je lade indenant cui mês di Fevrâr e Jugn, a fevelâ e imparâ robis sui tomâts e sul mac di San Zuan. Par sierâ la croniche al va ripuartât che e à vinçût Virilia, ma nol podeve jessi diferent, stant al so Campus di Cerneglons e al so Master a Manaçons. E vincidôrs a son stâts ancje une strie e un benandant, che si son puartâts cjase i ultins doi calendaris des Contis dal Mês.
La serade, cun di plui, si è sierade in bielece, cun ducj a mangjâ e bevi sot de musiche dal dj, Ostîr e Famei a balâ come semos e un supergraciis a lis Tarlupulis, che nus àn puartât fin a Cormons e tratât tant che siôrs!
- Il Quiz dai mês a Cormons – La croniche
- Cualchi peraule su “Lis Contis dal mês”
- Articul di lanç de serade
