Il Quiz dai Mês a Cormons – La croniche

E nuie, o vin petade ancje di meti adun une serade a Cormons, dilunc de Fieste de Ue, e sot dai voi di Dante e denant di chei mats che a fasevin la gare di Mountain Bike o vin cirût di rignovî la formule dal nestri Quiz dai Mês. Di biel al jere che o o jerin in tancj e l’Ostîr al à podût sedi cambiâ un toc dal copion, sedi inventâsi un gnûf personaç di butâ tal davoi.

Ma intant che us metìn cualchi fotografie de serade, che di cuant che o vin un Muini fotograf Stiefin ant’ vin une vore, us contìn ancje cemût che je lade.

Tant par scomençâ, bielzà inte fase des presentazions, a son tacâts i fastidis. La nestre presentadore Fogolina Sereni e veve bielzà anunciât Berto Agnule, concorint che al veve di sfidâ Astridia Virili, ma il biât nol è saltât fûr. Al pâr che al fos cjoc impegnât a firmâ autografs di cualchi bande de sagre, e nie… o vin subit cjatât un sostitût ancjetant valent. Di fat, un tâl Franco Gianluchi al à fat sudâ la sô aversarie, e ancje la presentadore e ancje il FEF, Londar Micheli, espert di furlan.

Par fortune che a tirâ fûr il Quiz dal pantan al è rivât il fidât Tamo Franceschi, clamât cussì propit par vie de cjante – ho scritto Tamo sulla sabbia – e pront a lei il prin mês estrat a câs de valete indisponente Galleria Giorgi. Par no dî dai intervents fûr scuare di un matucel dal public, vistût di lavande, cuntune cjapiele di macaco e simpri pront a meti in discussion dut. E il mês che al è saltât fûr al è stât nuiemancl che chest, Setembar, e o vin discuviert une vore di robis sui Benandants (e lis striis, soredut chê a stâ a cjase di Franco Gianluchi)

La Astridia, cun Setembar, e je passade subit a comandâ, stant che e à studiât intal Campus di Cjarlins (o forsi jerial Cjamin? O Cjasteons? Cui si vise) e e à ancje cjapât un master a Manazzons. Ma il quiz al è lunc e forsi il mâc Serafino Strolic (chel çondar che al menave zarde intal public) al à distrat la concorinte cui siei zûcs di magjie maraveôs. Pensait che al à fat un che nol à mai falât une volte! E no content al à metût sù ancje un concors, par regalâ une copie dal maraveôs calendari des contis dal mês a un Benandant e une copie a une Strie. VEn a stâi il quiz par scuvierzi se si è un o chel altri.

E dopo? E dopo e je stade la volte dal mês di Fevrâr, cui tomâts, e dal mês di Jugn, cul mac di San Zuan. I concorints si son dâts bataie, e il FEF al à sclarît dutis lis cuistions cjapant sù dal libri des Contis dal Mês.

La competizion e je finide 6 – 4 par Virilia, che e à vinçût il Quiz dai Mês, dopo che la ultime volte e jere lade a finîle a pâr. Altri? Ma sigure… O vin mangjât e bevût e balât, ospits des maraveosis Tarlupulis che nus àn invidât a chi a Cormòns, che no jerin mai stâts prime.