Lis Contis dal Mês – Il libri

E veve di sei une idee par regalâ alc, ogni mês, a chei che a lein chest sît. Al veve di sei un miscliç di narative e sagjistiche, par contâ storiis e folclôr dal Friûl. Ma l’an sielzût al jere nuie di mancul che il 2020, unic inte storie dal om. Si che al è deventât un libri che al è ancje un diari, une croniche, une testemoneance, une memorie.

Un trop di contis modernis che a tamesin il Friûl, di ogni etât e muse, e a mostrin la maniere che al à frontât l’infet, cui fats che i son corûts framieç, propite dilunc di chei dîs. Une grampe di articui sclets, che a butin une voglade su sugjestions e tradizions dal nestri teritori. A dividi storiis e informazions, i dissens che lis àn compagnadis e, doprant une vivarose zonte digjitâl, disponibile par cui che al à il libri, ancje ducj chei altris contignûts, no simpri leteraris e fats di peraulis.

“Lis Contis dal Mês” al è un progjet coletîf, cressût bot e sclop, un lavôr che al à contât fûr par fûr dut un an: al merete di stâ neri su blanc, di jessi let, gjoldût e regalât, pûr pûr cuntun sclip di maluserie e incredulitât, mâl platadis jenfri lis riis.

DETAIS DAL LIBRI

Titul: Lis Contis dal Mês

Autôrs: Raffaele Serafini, Serena Fogolini

A àn contribuît: Astrid Virili, Checo Tam, Jacum e Ricart Tiburzi, Margarite Cogoi, Michêl Londar, Pablo Gortan

Pagjinis: 325

Edizions: Contecurte

Contignût: 12 contis, 12 articui, 12 dissens in b/n + contignûts digjitâi esclusîfs (altris contis, altris dissens, musiche, videos, manuâi, passetimps)

“Lis Contis dal Mês” al è, di fat, il prin libri di Chei di Contecurte.

______________________

Par vêlu a son dôs manieris:

  1. par CONSEGNIS A MAN o SPEDIZIONS VIE PUESTE in zone “Chei di Contecurte” o podês scrivi a chest recapit di pueste eletroniche: contecurte@gmail.com o ancje drets al ostîr, gelostellato@gmail.com e domandâlu.
  2. Se o sês plui lontans il libri al è disponibil SU AMAZON a chest leam, e se no sês a stâ in Italie si cjate anche su Amazon France, Gjermanie, USA, UK, Spagne, Paîs Bas, Svezie, Polonie, Gjapon, Canadà, Australie

Par paià lis consegnis a man (al presit scontât di 13€!) o vês trê pussibilitâts:

  • cui bêçs al moment de consegne
  • cuntun versament su la PostePay di Contecurte 4023 6010 2511 4026 
  • su Paypal doprant la mail di contecurte@gmail.com

Pai amîs argjentins o segnalìn che diviers sîts di Amazon a permetin la spedizion in Argjentine. Tal moment che o scrivìn (Zenâr 2023) a spedissin in Argjentine i sîts di amazon.com .it .de .es e .fr – cun amazon.fr che al da la spedizion plui a bon presit.