Ce contino a San Zorz – E cumò che tu le às contade?

San Zorz, ai 14 di Otubar dal 2015
Vile Dora

La ultime serade e je stade cence dubi la plui partecipade. Parcèèè? Ma clare! L’Ostîr al veve di publicâ il so prin libri – Contis di Famee – che al è stât pront, par une schirie di fastidis, propite par chê zornade e lu no lu à savût fin tal ultin minût. Di fat, cheste date e je ancje la date di stampe dal libri. Ma ancje se nol saveve se a saressin stadis lis copiis fisichis, aromai l’event al jere pront e al veve di fâsi intervistâ, come autôr. Sì che duncje, cuant che al jere rivât il moment, al veve lassât il microfon a Carli Pup, e si veve sentât tal public par jevâ sù un moment dopo clamât in cause come autôr. Ce simpatics eh?

E dut chest in bande des rubrichis di simpri. La conte misteriose, La manarie, che cjatais intal librut, e che e jere talmentri misteriose che l’Ostîr nol si visave plui cui che al è l’autôr (Agota Kristof). In bande des contis di famee o vin vût lis contis curtissimis, e une conte cuntun Checo in version militâr dal nestri Pablo Gortan, che al sarès deventât il Cramâr de Ostarie, e al jere presint tal public, simpri a zâl par fâsi viodi. Bizio e Franco, chest colp, a jerin puntuâi (si no l’Ostîr a ju copave) e a àn sierât la serade cun la cjante liberatorie par ducj nô de Ostarie, che nus domande se o sin mai stâts a Cjasottis, deventade par la ocasion “Sêstu mai stât a San Zorz”.

La serade, in ogni câs, e jere dediade al efiet che une conte e à su cui che al lei e a ce che e lasse, a cuâi pensîrs. La fotografie doprade pe locandine e sarès deventade une imagjin dal secont libri, e di li a 15 dîs, l’Ostîr al varès vinçût il so prin San Simon, ancje se al veve bielza festegjât la vitorie 4 mês prime, cuntune gridelade des sôs. Insome… cheste, ae fin, e je stade une des seradis plui ben jessudis de ostarie. Di San Zorz, po dopo, in pratiche nol jere mai nissun a viodilis, ma noaltris si sin divertûts une vore!  

Riferiments

• Articul di promozion de serade
• Croniche de serade su Contecurte
• Parcè scrivi contis par furlan: dutis lis rispuestis
• Contis di famee, di Rafaêl Serafin