Contâ Cemût Contâ

Listize ai 29 di Novembar dal 2019
Bar Las Aganes

Ae fin al è capitât: l’Ostîr al è stât arestât e processât! La sô colpe? Vê publicât no un, no doi, ma adiriture cinc libris ducj fats di contis! E cun di plui dome di contis in lenghe furlane!

Intal proces par diretissime che si è davuelzût a Listize, il public al à podût fâ di jurie e a son stâts clamâts a testemoneâ cuasi ducj chei di Contecurte. Il Famei, la Massarie e la Coghe a àn let tocs gjavâts dai libris dal Ostîr intant che lui al cirive di difindisi da lis domandis di Maurizio Della Negra, PM che al à vût mostrât dutis lis provis a favôr o cuintri dal imputât metudis adun de Sartore de Osterie.

Cirint di spiegâ cemût che a si scrivin lis contis curtis, l’Ostîr al à fat lei Contis di famee, un toc di Contis sot spirt e une conte dal ultim libri che al à vinçût il San Simon, Bisest. E cun di plui, par Soreli jevât a mont, e je stade lete ancje une storie inedite, ambientade a Sclaunic, cuntun yokai terificant!

Riferiments

• Cemût scrivi une conte curte
• “Anin” une conte di famee su Contecurte
• Lets in osterie: Soreli jevât a mont
• “Bisest” il libri dal San Simon