ScueleCurte: O vin fat 30….

O ben… O sin rivâts a 30 iscrits ae ScueleCurte e cheste, par noaltris, e je une biele gnove!

E stant che al è ancjemò pussibil jentrâ in gare…ops, iscrivisi a Scuele dentri dal mês di Setembar o vin gust di spindi dôs peraulis su cheste tierce CorseCurte.

Duncje… O vês za viodût cuai che a son stâts i temis di ispirazion par il mês di Setembar e o vês viodût ancje che a son stâts ducj doprâts almancul par une conte, dai 22 students che a àn za scrit la lôr conte. Il teme che par cumò al pâr jessi plasût di plui al è chel di Tecnologjie, cul so “tramai“, ma la robe no nus maravee… o savin ben che i furlans a son int di spirit pratic e di manovâl! A pari merit, però, il teme di siencis, cun dut chel cjalt che o vin vût cheste Istât, al à stiçât une vore di fantasiis. Dutcâs, al va dit che, forsit in maniere inspietade, ancje il teme di Furlan, dediât al nestri Famei, al è stât une vore partecipât! In sumis… par cui che al à gust di leisi lis contis al è une vore di sielzi, dai aliens a lis contis sociâls, dal fantasy e chês romantichis, di chês plenis di ironie e chês crudis e garbis.

O sperìn, in chescj ultins dîs dal mês, che ducj a rivin a scrivi la lôr conte, e o savìn che i professôrs a son za seneôs di lei e meti i lôr vôts. L’Ostîr intant al è za dâûr a dâ il judizi di condote, che come che o savês si sbasse cul plui svicinâsi a la scjadince, ma al ten cont ancje dai sforaments di caratars, se a son tantis falopis di grafie, o se il teme de materie al è stât cjapât un pôc masse a la lontane. Ma juste par capî che la condote, ca in Osterie, e je robe vonde anarchiche, par cumò il vôt plui bas che al à dât al è un 8.

Ce altri dî… Bon, si pues dî che a son za saltadis fûr des bielis contis, contis di gale, che o crodìn che a plasaran a dut il Consei di Classe. E o podìn dî ancje che par cumò nus somee che ducj i partecipants a sedin contents e di vê inviât une formule e un andament che al darà buinis sodisfazions a ducj chei che a son dentri.

Ve chi, alore, se o vês voie di scrivi par furlan une pagjine al mês e jentrâ in classe par competi, a mancjin pôcs dîs par iscrivisi e cjapâ il tren cul ultin vagon, par gjoldisi un biel viaç! O vin fat 30, ma al sarès biel fâ 31, 32, 33… Su po, tigneit sveât il çurviel e scriveit par furlan ancje se no crodês di jessi bogns. (tant al è l’Ostîr che us jude)

E un graciis, par intant, a ducj chei che a àn za scrit!