Un teremot di contis!

Ve ca, che o vin voie di contâ cualchi gnove che aromai e je viere, ma che e je ancjemò buine.

Ca parsore us vin metût la locandine de Associazion Teatrâl Furlane par chest an, dal solit concors, e cheste le podês cjatâ ancje sul sît de associazion. Ma in bande dal concors solit, o viodês che e je ancje une sezion speciâl pal innovâl dal teremot. Si clame No smenteâ, e il president Covàs, che ogni tant al è passât ancje par cheste Ostarie, nus diseve che i sarès plasût tirâ dongje une grampute di contis curtis, magari par fâ une leture, e dutcâs par memoreâ, magari in maniere origjinâl e scalembre, il teremot dal ’76. Par mandâle al baste compilâ il form di google che o cjatais tal leam sul sît, ma o vin altri ce contâ.

Stant che l’Ostîr, no si sa parcè, al à che di tornâ a lavorâ, o vin pensât di butâus une idee. Tant par scomençâ o sin in spiete dal nestri storic Sclapeçocs (o Sclapeçocs storic, viodêt voaltris) Carli Pup che nus scrivarà cualchi rie di ispirazion. La veretât e je che sul teremot al pâr che ducj a vedin za dite dut, e nol è facil tirâ fûr alc di gnûf, soredut di narative curte.

E alore ve ca che intant che o restin in spiete de ispirazion dal Pup, il nestri ostîr nus lasse cualchi idee di sugjeriments e tecnichis narativis. In particolâr nus dîs:

“Ma cjalait, se jo o les a un spetacul di contis par memoreâ il teremot o varès za un probleme, tal sens che o sai za ce spietâmi. Di une bande la tendince a contâ l’event par mostrâ trop fuart che al jere – ven a stâi cadavars, rudinaçs, pôre, il fûr dal ordenari… –  e di une altre bande la solite retoriche dal furlan cetant brâf, dal fasìn di bessôi… Nuie di mâl, par caritât, ma bisugne visâsi che une conte al è un prodot leterari che al à di plasê e stiçâ e intratignî, e colant in chestis dôs pocis no sai se al sarès gjoldibil. Par memoreâ si memoree, ma a chest pont o voi a viodi un dai tancj saçs che a son za stâts scrits o il docufilm che al zire e soi a puest. 

Cualchi vie leterarie che mi plasarès di plui, par esempli, e je che che ti conte lis robis piçulis, lis storiis che nissun al pense e al sa, e nancje al imagjine. Robis di famee, di persone, di nuie, che magari ti gjavin dal ingôs e ti fasin fâ une ridade o che ti fasin pensâ robis che no tu suspietavis. O pûr misturâ alc di ironic… e magari ironie e critiche sociâl. Par jessi lets in public a podaressin jessi contis in prime persone, ma o pensi che a podaressin rindi une vore ben ancje in seconde persone. Une robe di no fâ, savint za che ae fin si fevele di teremot, e je chê di fâ la sorprese finâl disint che al jere il teremot. E une altre robe che e à scomençât a jessi pardabon masse doprade e je chê similitudin dal Orcul e dal Orcolat… ancje vonde, se al è simpri ta chê maniere.

In sumis… nol è facil. Ma se no ce gust isal a scrivi?”

Nus pareve… mai un parê polically correct… bon, nus tocje cjapâlu come che al è. Ma par cumò… scrivêt! Il teme lu vin dât e us disìn daûrman che us covente par fâ alenament.

O restìn in spiete des vuestris contis!