Il Drâc di San Marc

O vin une gnove che cualchidun al savarà, ma tancj, cuasi ducj, ancjemò no san, o pûr a crodin di savê, ma in veretât no àn capît nuie.
La gnove e je che l’Ostîr al à scrit un gnûf libri!

Al è un libri di haiku par furlan, cun dentri nuiemancul che 100 haiku, scrits dilunc di chescj ultins dîs agns, dulà che ogni haiku al è compagnât di un coment e di une imagjin che a contin la sô divignince e ancje de traduzion par talian. La Sartore, che e à vût la fortune di leilu e di vê une des pocjis copiis sparniçadis ator, e à dit che al è pardabon un biel lavôr e che al meretarès pandût, ma lui, l’Ostîr, nol è propite intune fase sociâl e vierte al public.
Al à decidût che il libri nol sarès lât a finîle su la cjarte.

Il libri al sarès lât a finîle… suntun mûr!
Sì, o vês capît ben. L’Ostîr, che si svarie ancje cu la street art, al à decidût di piturâ un murales bocon e une vore colorât (8m x 3m) che al rapresente un Drâc in stîl gjaponês, cui colôrs dal Arc di San Marc. E dentri des scais di chê besteate al à scrit i siei 100 haiku furlans. Us disarìn di plui: al à propit creât un codiç che al volte i sintiments e la poetiche gjaponese par furlan, dantsi des regulis e cirint di rispietâlis. Il murales lu cjatais a Sclaunic, sul daûr di cjase sô, in vie Monte Nero, 19, e jessint sul daûr de cjase, al è libar di essi cjalât e… let. Eh sì, parcè che si ben che il libri al esisti, l’Ostîr al à pensât ben di regalâ la copie digjitâl dome a chei che a son vignûts al aperitîf dal Drâc, une presentazion in stîl flash mob dulà che si son presentadis dome une piçule grampe di personis. Al restarà cussì un lavôr platât e sotvie, che – al à dit – “Come che al sucêt par solit lu scuvierzaràn dopo muart e disaran che al è pardabon biel”.

Dutcâs, al à pensât ben di disvelâ la sô esistence a voaltris de Ostarie, ancje corint il risi di cjatâus daûr di cjase e scugnî ofrî une bire intant che o sês daûr a lei i haiku.
Se o volês savê di plui, su ce che i è saltât pal cjâf di fâ cheste matuçade e sui haiku, a cjatais un pocjis di robis sul sô sît e al à vût la gracie ancje di meti dute la jentrade de opare.

Ce altri? Nuie… nus à mandât un pocjis di fotos e di haiku di doprâ par chest articul e par cumò, par lei il gnûf libri dal Ostîr, tocje lâ a leilu suntun mûr!