CC24_La classifiche di Jugn

O sin a miezis!

E al è incredibil, ma cuasi ducj i mus a son rivâts a partî ancje par chest mês di Jugn, dulà che il teme al jere a dî pôc particolâr… A vevin di scrivi une conte savint dome il titul, pecjât che il titul… al veve di jessi il non di un altri mus! Ma o vin di dî che no dome le àn puartade fûr ben, ma che al è saltât fûr un mês siôr di bielis contis, forsit il plui combatût di ducj.

E al covente marcâ alc altri, prime di mostrâus la classifiche dal mês di Jugn. Clare, che al pâr che dôs contis a vedin dominât, ma o vin almancul une desene che e je plasude une vore, mo a un mo a chel altri te zurie. Une conte che e à vût doi podis par cualchidun e je adiriture lade a finîle ultime par cualchidun altri… in sumis. Come simpri lis robis a son une vore in moviment. Dut câs, dôs contis a son ladis parsore di dutis chês altris e a àn meretât di zuiâsi la vitorie. E dut câs, a son chês che miôr a àn doprât il titul par costruî la conte. Pardabon doi biei tocs che us consein di lei: Glorious Grene, scrite di Atile e Biscromis, scrite di Catine la Nere.

Ma vele ca la classifiche dal mês di Jugn (e come simpri us visin che su Instagram e su Fb o cjatais lis imagjins, par viodilis miôr).

Ma in bande dai prins doi, une siore conte le à poiade ancje Glorious Grene, e o vin vût un outsider che dal font al à fat un salt no di ridi: Siruc, cu la sô Daur la lavagne, plasude a ducj. E cun di plui, a son altris 5-6 contis che a son rivadis devant e magari par cuistion di centimetris no le àn petade. Muspilli, Nevio, Teresine la çuete, Matungo, Secretariât… vait a leilis che us conven. Un mês che al puartave, us visìn, ae classifiche di Vierte e a la metât gare e ancje se al à vinçût cui che al jere in vantaç nol è stât propit cussì facil.

Ma viodile cheste classifiche de Vierte, cemût che je lade, e cu lis posizions precedentis par fâ il confront.

Teresine la çuete ju à comedâts ducj e si propon come musse plui in forme e plene di morbin. Al è ce vê pôre, stant che e à vuadagnât, in chescj trê mês, une grampe di ponts su ducj, e e je jê che e vinç il titul di Campion di Vierte!

E daspò di chescj risultâts vele la classifiche plui impaurtante… la gjenerâl, che no viôt tancj cambiaments ma si è scurtade in plui bandis.

I prins trê a son simpri chei, ma Brene Sfolmenade al à zuiât in difese e Catine la Nere e Glorious Grene a àn profitât e cumò a son une vore plui dongje. Po dopo, come za dit, Teresine la çuete e rive in bombe e ancje Atile, pe seconde volte vincidôr, al pâr jessi tornât in corse par il podi. Muspilli e Nonio, par altri, a no molin di un metro e dome Torototele al à tirât il flât, in cheste tape. E a onôr di croniche, al va dit che ducj chei che a àn fat plui di 100 ponts a puedin stâ contents, che al è un risultât une vore bon.

Che po, la corse daûr vie no je mighe mancul interessante. O vin chest colp di Siruc che al ven sù, e altris come Derna e Nevio si gjavin  vie des parts bassis, dulà che invezit a parin colâ Ippogrifo e Incocalît, in crisi di risultâts.

Di daûr dal bancon, l’Ostîr al lei e al gjolt, stant che sedi in cualitât, sedi in cuantitât, o stin sfruçonant ducj i primâts de nestre Ostarie e sperin che si ledi indevant cussì, cu la prossime tape di ambientazion che nus puarte a torzeon pal mont.

Nol reste che cucâ il FantaCorseCurte, dulà che lis robis a son ancjemò plui tiradis. I prins trê a àn imbrucjât lis primis dôs contiis e la situazion no je duncje mudade, pûr pûr cul fat che a stan distacant chei altris. Ve le ca la classifiche:

Muspilli, Derna, gjatemarangule… cui pierdaraial il colp? La gare e je lungje e aromai si è capît che chescj ca a lein dutis lis contis e pierdin la sium par decidi su cui scometi.

Par jessi rivâts a metât de corse, al va dit che al è dut une vore in bilic… ancje parcè che bisugne viodi se su la lungje distance il mus in teste a rivaran a mantignî chest ritmo o se a molaran il colp… Cuissà…