Lupo Manarie nus vierç Instagram

Nol capite ogni dì di jessi cjase tô, cuiet, dutcâs un tic maluseriôs, cuntun cafè su la cusine e un vanzum di frico a scjaldâ tun padielin, e di sintî une rugnade in zardin e un sfolmenâ di gjalinis e di cognossi subite chê vôs e pardabon restâ incantesemâts, cul cafè che al sborfe a pitinton cisant e molant fûr une sclipignade ferbinte e il frico che al tache a intacâsi stiçât.
Al è ce che al capitât al Ostîr, pôcs dîs dopo dal spetacul, cuant che Lupo Manarie in persone si è presentât tal mieç dal sô zardin.
«Bufhndì!» i veve fat di lontant scjassant la man e spudant plumis. «Ofristu un cafê, Ostîr?»
«Ven sù, ven sù», al veve scugnût rispuindi chel, viodintlu bielzà sù pes scjalis. «Sêtu in machine?»
«Ah no, chê no le dopri plui», al veve dit Lupo Manarie, e dopo, slungjant la çate, «Cjape ca, ti ai puartât un regâl!»
La mieze gjaline roseade e spissulave inmò di sanc, ma ce vûstu… al è Lupo Manarie… «Oh, di fâ brût, eh, che e je vecje e dure come il corean», al veve zontât, netantsi lis ongolatis tal pêl. «In sumis, cemût? Do jeristu chê altre sere?»
«Eh… no cumbinavi!»
«Pecjât! Un sucesson! Tu vevis di viodi ce bulo che soi stât! Ma… ti viôt fastidiât? Vûstu un colp di manarie, che tu ti tiris sù?»
«Ma no po! No ai fastidis che si risolvin cu la manarie».
«E ce fastidis âstu, Ostîr?»
«Eh… O volevi vierzi cualchi social gnûf a la osterie, ce saio, fâ un pôc di reclam… Sâtu che o vin fat nuiemancul che nûf spetacui, chest an, comprendût il to. Bisugnarès pandi di plui chestis robis».
«Orpo! E ce i vulie, ti vierç dut jo! Dâmi ca la clâf, po!»
«Ma no! Il fastidi nol è vierzi… bisugne cjatâ i follower dopo».
«Followêrs?»
«Ma sì, chei che ti vegnin daûr! Che tu i plasis, che ti metin i cûrs…»
«E ce i vulie, tai cjati jo! Tu vierç la puarte, li».
«Ma no, che no soi jo che lu fâs. O ai incargât un peteçon, un gnûf acuist».
«E do lu cjatio?»
«Imagjini cjase sô ve, ma ce ti interessie?»
Ma Lupo Manarie al veve bielzà voltât la schene e al jere lât vie, lassant il padielin dal frico vueit e il puartelut dal gjalinâr spalancât.

Nancje un pâr di oris dopo al jere devant de puarte di Alessio, il Peteçon de Osterie, che i scampanotave come un mat.
Chel i veve vierzût e par pôc no i veve vignût un imbast.
«Âstu viert chê robe che ti à dit l’Ostîr?»
«Ce robe? Il profil Instagram di Contecurte? Sì, sì… tu lu cjatis subit, baste cirî contecurte».
«E alore cjape ca! Ti ai puartât ducj chei ca!» e dite chest si jere spostât de puarte e daûr di lui a jerin in file indiane almancul un centenâr di personis, ordenadis e cidinis, cuntune biele ghigne model paresi inclaudade su la muse.
Lupo al veve scjassât la manarie cuintri di lôr e al veve businât: «Vere che us plâs? Dai… disêt, disêt…»
E chei…
«Ci piaci!»
«Ci piaci tantissimo»
«I love you!»
«Ti vogliamo bene!»
«Sei meraviglioso! Stupendo!»
«Ti amo Lupo Manarie».
E intant che a disevin cussì a fasevin ducj un corisin, pleant indiçs e poleârs.
«Ve ca, come che mi à dit l’Ostîr. Precîs precîs. Che ti vegnin daûr e che tu i plasis e ti metin il cûr. Ti bastino chei ca o aio di lâ a cjolti altris?»
«Vo-vo-vonde chescj», al veve barbotât il Peteçon de Ostarie, e prin che al podès bati cee Lupo Manarie al jere za sparît.
Devant di lui al jere restât dome un trop di follower.
La plui part, cu lis mudantis sporcjis.

di Rafaêl Serafin
#1***

Note1: Vait subit su Instagram e follouait la pagjine di Contecurte! Ordin di Lupo Manarie.

Note2: nissun follower al è stât ofindût par scrivi cheste conte.