CorseCurte – La Classifiche di Lui

O sin ai sedis! E noaltris o sin puntuâi come simpri. E se o sin cetant puntuâi un super graciis al va ai nestris doi de zurie, Carli Pup, che al è tornât in vore, dopo la sostituzion dal mês di Jugn, e Zuanluche Franc, che ogni mês a son prefets intes lôr valutazions, che si metin dongje di chês dal Ostîr.

Mês di Lui, si diseve, dulà che il teme al jere chel de Aghe, e nancje a fâlu a pueste, al è stât e al sarà un teme cetant dibatût, par vie de so mancjance. E chest sut si è ribaltât su lis contis, stant che almancul miezis a àn cjapât in considerazion chest teme, cualchi volte lant une vore dongje, intai lôr intindiments sociâi e riferiments al dì di vuê.

E alore anìn a viodile cheste classifiche dal mês di Lui, che us anticipin subite, e puarte plui di cualchi sorprese.

Tant par scomençâ lis contis son stadis 23, simpri un numar alt, tignût cont di une competizion che si e dure un an intîr. E seconde robe, o viodês che chest colp il judizi dal public al è stât determinant, no cate che variegât. Al è rivât prin, rompint il domini dai solits, il Lupusinfabula, cuntune conte cuasi nichiliste, che nus innee, al è propite il câs di dîlu, inte aghe dal mâr. Mari mâr no sarà une conte legre, ma e je dramatiche intune maniere eficaç e sedi la jurie, sedi il public, a àn preseât il toc. Daûr di lui il Cjicechepicjedispicjelacite nol mole un colp: Pantan al è un altri toc crût e sec, che al rive subite. Sul podi altre conferme, stant che il Volketitrai-Liga al poie la sô conte sociâl e chest colp cence lâ a cirî intal mont dal fantastic: cui cence, cui masse, nus dîs.

Ma lis sorpresis no son finidis, stant che o vin vût un passaç a vueis sedi pal secont il classifiche, il Real Cocâl, sedi par un altri ben plaçât come il Barba Pisul Stentadizza. Di chê altre bande un biel toc lu à poiât jù il Vecjo Claes, intal so miôr plaçament de stagjon. E insiemi cul lui ancje il Copasse Blu, judât dal public, al à rivât adore a vuadagnâ posizions. E simpri cjacarant di risultâts di Lui, ben par il Borussia Dordul, simpri tes primis posizions, un pôc mancul par l’Atletic Gjatui, che al tire un tic il flât. E ben par Argo Patùs, in evidence, e un pôc mancul par il Sbreghebalon, ancje lui inte mieze classifiche. Di marcâ, in ogni câs, che la diference di pont e je pardabon minime.

E alore anìn a viodi il nestri public cemût che si è classificât tal Fantacorsecurte.

Nol cambie il prin in classifiche, Noemi Salva, ma ancje achì, grandis sorpresis. Nene si è tirade pardabon sot e cumò e je daûr a insidiâ il prin puest. Lussian al à scometût suntun toc biel che ma nol à fat masse ponts e al è restât indaûr. Gjatemarangule e il Volketitrai-Liga a somein viazâ viers il podi, Rosute Pelote e Lupusinfabula permetint… insome, il FantaCorseCurte al è une vore vivarôs!

Cundut di chescj risultâts dal mês di Lui, ve chi che alore o viodìn cheste Classifiche Gjenerâl, cuant che a mancjin ancjemò 5 zornadis di campionât.

I prins trê no son cambiâts, ma in cheste zornade il Cjicechepicjedispicjelacite e à fat pardabon un salt sui soi inseguidôrs, il Real Cocâl e il Borussia Dordul, che a son clamâts, intal mês di Avost, e un riscat imediât, se a àn voie di blocâ lis aspirazions di podi dal Volketitrai-Liga. Chescj cuatri al pâr che a sedin, se a van indevant cussì, i cuatri che si barufin il titul. Ma…

Daûr e je dute une gran balfuerie. Cuntun passaç a vueit, lu sa ben il Barba Pisul Stentadizza, si va a risi di jessi tirâts subit indaûr. Lupusinfabula e Vecjo Claes nus àn mostrât come che si pues, cjapant la glagn di un bon toc, tirâsi sù di bot e lâ a guziâ la part plui alte de classifiche. Cjalait dal 5 al 11, che a son ducj in pôc plui di une ventine di ponts, ven a stâi, une zornade di campionât. Insome… cui che al à voie di restâ in zone champions, al à di sudâsale! E alore…

Indevant cu la Corse Curte! (E viodêt che nol è vietât jentrâ in gare ancje cumò, magari dome par divertiment)

E se o vês voie di viodi dute la gare, us visìn de pagjine dediade al event.

1 coments On CorseCurte – La Classifiche di Lui

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît