Cemût si zuiâl? Acuilon – Bale sul mûr – Arc cui fiers di ombrene

Acuilon
A son zûcs ce no somein viodi mai la fin e ancje se cualchi volte a cambiin cetant di no cognossiu plui, a mantegnin tal timp la fuarce che ju sburte. L’acuilon al è un di chei: un zûc che al permet, in cualchi maniere, di svolâ. E se l’acuilon di vuê o podìn dî che a sedin i drons, chel di une volte al à une grande diference: no si comprave, ma si veve di fâlu sù in cjase. Sì che duncje, al jere un zûc che al meteve insiemi corse e braûre cun manualitât e sgrimie tal costruî.
Si taiave a forme di losanghe la cjarte par fâ pacs (par solit cjarte di rîs zale) e si picje intor une crôs fate di bambù o stecuts une vore fins, tacâts cu la cole fate messedant aghe e farine di flôr.
La code par dâi stabilitât e jere fate di anei di cjarte fissâts simpri cun chê cole. Daspò al bastave peâ il spali e vie a cori a pitinton pes stradis vueidis di une volte (o ancje di cumò, cuant che o sin in timp di cuarantene)

Arc cui fiers di ombrene
Rivâ adore a meti adun une arme, un strument di ofese, cun cuardis, len, astics o cuissà ce altri, al jere un vizi di cuasi ducj i mascjos; e plui la robe e veve un ciert nivel di pericolositât, plui a stiçave.
Achì a coventave une viere ombrene, butade vie o vonde ruvinade di no coventâ plui. Si peavin lis stecjis strenzintlis ben cul fîl di ram e si formave l’arc tirant lis pontis cuntun spali. L’arc al è picinin, e je vere, ma fat su stecjis di açâl, armonic e cun plui potence. Lis frecis si fasevin ancje chês cun açâl, doprant simpri lis stecjis de stesse ombrene uçadis su la muele o cuntune raspe. E saltave fûr une vere arme, che e podeve jessi doprade par lâ a cjace di piçui nemai, come crots o pantianis, ma ancje – in alternative ae fionde – di zenevrons

Bale sul mûr
Chest, plui che di mascjos, al jere un zûc di frutis, ma no dome.
Al è in ogni câs un zûc dulâ che bisugne jessi coordenâts e al covente une vore pôc: un mûr e un balon e si pues zuiâ ancje di bessôi. Si tire la bale cuintri il mûr e si à di cjapâle cence che e coli par tiere cu lis mans, cjantant o disint des filastrocjis. Par esempli: cuntune man, cence movisi, suntun pît, batint lis mans, fasint une zirevolte… e vie cussì.

1 coments On Cemût si zuiâl? Acuilon – Bale sul mûr – Arc cui fiers di ombrene

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît