CC26Otubar#04 – Il comodin di none Minte

#04 – Il comodin di none Minte

O ai lâ a fâ un viaç tal Univiers e o sai cemût fâ. Non ai pôre de distance. Baste dome fâ un resonament: trops ponts sono tra un un cjanton e chel altri dal cassetin dal vecjo comodin che o ai ereditât de none Minte? Infinîts.
Trops ponts sono tra un confin e chel altri dal Univiers? Infinîts.
Ma alore il comodin de none e l’Univiers a son la stesse robe! E ve parcè che une particule e pues influençâ une altre ancje a milions di agns-lûs di distance!
Particulis subatomichis, no chês de Comunion, eh!
Insome,o sin ducj colegâts.

Bon. Alore, se jo o jentri ta chel cassetin di bot o sarai ai confins dal Univiers, lu sai. Al è un cassetin magjic. Baste dome concentrâsi. Jo o ai ancje une altre cualitât: o pues slungjâmi come Mister Fantastic, chel cu la tute blu dai fumuts, e ancje strenzimi par jentrâ tal cassetin. E o varès di puartâ cun me ancje un compagn di viaç. Mi plasarès il gjat di Schroedinger ma no sai se mal preste Schroedinger…

“Cjale che Schroedinger al è muart e ancje il gjat…”

Ah, no savevi, puarets. Mi displâs.

“Ma viôt che il gjat al è ancje vîf ma no pensi che al vedi voie di vignî cun te!”

Po bon: alore o jentri dentri cul mio gjatut, Oscar. Lui nol à problemis. Al jentre spes tal cassetin. Al è il so ream.
Ve che o jentri ancje jo cun lui.

Bon. Si decole, baste resonâ. Si decole cence movisi. Jo o soi infinît, il gno gjat ancje. L’Univiers al è infinît. O vin i stes ponts tra il mio cjâf e i pîts, tra un confin e chel altri dal Univiers, tra un lât e chel altri dal cassetin, tra il cjavut e la code dal gjat.
Al è cussì. Al scugne jessi cussì.

O soi rivât al confin cence jessimi mai mot. Anzit o soi un unic pont infinît; o soi jo me, o soi ancje il gjat; o soi jo l’Univiers! La Singolaritât!
E cumò ce puedio fâ?

FIAT LUX!

(dedicât a Isaac Asimov)

Materie: Matematiche
di…
#1937