Un daspò misdì d’Istât

Gno santul mi veve dât cuatri palanchis par ch’o ledi al cine la domenie. Mi paiave par vêlu judât dilunc la setemane in cierts lavoruts tal ort.
La locandine dal “Duello al sole” mi invidave a viodi une saghe di amôrs e odis. Volintîr o sarès lât a viodile, mi plasevin tant chês peliculis, dulà che i tîrs ti sivilavin tes orelis e che vivi al dipendeve che tu no tu fossis il bersai. E sarès stade une lungje session di filade pomeridiane ae insegne dal Ovest merecan.
Ma si sa che la robe e po ancje cambiâ, e cussì al fo. Sabide sot sere mi cjatai al improvîs devant dal barachin de place. Cuntune man in sachete o stazavi lis palanchis de jentrade al cine e cui voi o stazavi lis carobulis, bielis, sutis, al pareve lis vessin lustradis. Ce stevio par fâ… nuie di mâl, o pensai, o baratavi une gjonde cuntune altre. Mi slontanai dal barachin cuntun scartòs di carobulis in man e nuie in sachete.
Tal doman o dandanavi bessôl. E jere Domenie di un daspò misdì d’Istât. Il soreli colôr fûc al colave a plomp. La nature sturnide, plui che durmî e pisulave. I zovins dal borc, amîs miei, a vevin bielzà organizât ativitâts par fâ rivâ la gnot di chê zornade: lâ al cine, fâ un zîr in biciclete, a nadâ te roie, e … dome jo, o restai a sut.
Sentât fûr de gjelatarie, o cjalavi chei turiscj todescs, che tornant dal mâr a jentravin a rinfrescjâsi il gargat. La mê cjalade e leve daûr di ognidun che al ves in man un coni di gjelât. Di tant cjalâ, il voli si poiâ suntun scontrin che al svolitave rasintant tiere. Come un falcuç lu sgrifâi su e o leiei “Gelât dopli ae creme”.
Malsigûr o jentrai lant viers il gjelatâr, o vevi un cagot di chei, chest al cjalâ il scontrin, e cence dî ghets mi de un coni cun dôs balutis ae creme, o jessì di li tignintlu ben adalt, come se al fos une fale olimpiche.
Premurôs mi inviai viers il cine, o volevi che i miei amîs mi invidiassin. Biel ch’o levi, il coni si disfave, lis cremis mi sbrudiavin pe conole, par no pierdilis, lis levi lecant.
Cuant che i miei amîs a jessirin dal cine, jo o jeri li sentât sul muret… scunît e cul coni vueit e slapagnât in man.

di Galliano di Buenos Aires
#916