La Stagjon des Contis a Romans – La croniche

Al è di cuant che o vin publicât La Stagjon des Contische o pensìn che la serade juste par fâ une des nestris presentazions-spetacul e je nuiemancul che la serade de consegne dai atestâts a corsiscj di furlan.

E a Romans dal Lusinç, martars stât, il nestri contecurtâr Michêl Vuardianut Calligaris nus à dât la ocasion e… o vevin reson! E je stade une superserade divertente e zuiarine, dulà che o vin vût il plasê di no abadâ tant a la forme e a fâ lis robis dutis perfetis e si sin divertûts tant noaltris, tant – nus pâr – chei che o jerin a viodi.

La serade? Ah, ben, o stin un moment a spiâle. O vin tacât noaltris cence tantis menadis, cuntune cerce di un pâr di contis cjoltis dal libri. Une di Enrico Tomasi, legre tant che un gnot tal cimitieri, ma biele, e che e puarte pâs. Gjespui, lete dal famei, che e jere une des miôr dal mês dulà che il teme al jere, clare, l’Amont. E subit daûr, a fâ il pâr, une conte a teme Cricâdì, ven a stâi, Un amôr insumiât, lete di Astrid Virili, la nestre Stralunade sartore che le à ancje scrite e dutcâs e veve vinçût il mês di novembar.

E dopo?

E dopo ONTECURTUTIS! Regjinis di Instagram, in gracie dal nestri Peteçon, o vin come par solit let une grampade di ontecurtutis. Cualchidune che e faseve vignî i sgrisui, cualchidune e faseve ridi ancjemò prin di tacâ, e qualchi dune altre, come “Concert a sorprese in mont” e je stade adiriture profetiche. (I fan dal NoBorder a san ben di ce che o fevelin se o vais a lei la ontecurtute numar 23)

E dopo o vin let altris contis, ancje chestis mica simpri legris. Ma bielis, però, come Il non di mê mari, di Laurin Zuan Nardin, vincidore dal mês di Otubar, a teme Pôre. Lete di Zuanluche, il nestri mestri che al jere li ancje a fâ la part di mestri pardabon, pe Filologjiche. E in ultin, Creance, conte de vincidore de Corsecurte, Serena Coghe Fuguline, che nus à fevelât di colombis… a leile, cun creance, il nestri Muini Stiefin.

In sumis. Super serade, cul gust di tancj corsiscj che a àn cjolt il libri e che o sperin propit che ur plasi e sal gjoldin. E voaltris? Lu veso, La stagjon des Contis? Par cumò no vin altris seradis in programe, e al è un pecjât, stant che la serade si è sierade cuntune parentesi leterarie culturâl (dôs poesiis in lenghe foreste che a àn tocjât pardabon il cûr dal public) e une conte sperimentâl, La regjine, che e je talmentri sperimentâl che no vin ancjemò il coraç di metile sul sît. Domandâ al Berlon trop sperimentâl che e je par crodi.

E par viodi dutis lis fotos official de serade, restait in spiete dal inzornamente te maraveose pagjine In cjar e vues!

E intant… anìn indevant cu la CC24!

1 comment