Tu scrivarâs une conte ambientade… Il teme pe CorseCurte24 di Març

Al cjapà in man un mont, lu alçà inte lûs, lu fasè zirâ inte man tant che une bale. Al cjalâ dentri, di dongje.

Al jere un mont di DESERT. Savalon, cjalt, soreli e sut. Si cjalà ator imagjinant une version frede, di blanc e gris, ma no le cjatà. Un mont che nol jere a puartade di man, al pensà. Cussì al tacâ a cjapâ in man altris.

Intun al jere il BOSC, di vert e len e uciei e foncs.

Intun altri al jere il MÂR, e dongje di chel al viodè ancje monts cui FLUMS e cui LÂTS. Un altri ancjemò al jere un mont dut SOT AGHE, nuie altri che aghe. Un dongje chel altri a metevin dongje une poce di blu e celest che e platave un cjanton di colôrs plui stracs e tenars… al jere un mont di PALÛTS, e i pareve di sintî parfin l’odôr di clop. Dongje di chel, un mont di LAGUNE, no masse diferent, pûr pûr cun chel savôr di sâl, dulintor. Al voltà la cjalade viers altris monts. Ve la, un mont di CULINIS, di vîts e revocs di ulîfs, e in bande il vert dai PRÂTS, sfodrâts di rosis. I monts lu vevin simpri maraveât, ma no si podeve veiu ducj… no subit, almancul. Al alçà la voglade par adalt, e al viodè altris plui lontans, incredibii. Intun al jere dome AIAR, dut al svolave. Intun altri si jere intal SPAZI, framieç di stelis e planets.

Al cjapà in man un altri, dut scûr, che i pareve vueit, ma cjalantlu di dongje al viodè che al jere un mont di LANDRIS . Ma velì… nol veve cjalât in chê direzion… ce jerino ducj chei colôrs? Ah, maravee… un mont plen di palaçs e umanitât… une METROPOLI plene di casin e vite. Lu cjapà subit in man ancje chel, curiôs. Forsit masse casin, al resonà, prime che une vôs ruspiose, di daûr de schene, lu gjavàs vie dai siei pinsîrs.

«E allora? No può mica prenderli in mano tutti, sa? Il vetro della sfera si sporca e io poi li devo pulire! Ha intenzione di comprare qualcosa o è solo qui per guardare?»

L’om cuasi si vergognà. La prime volte che al meteve pît in chê buteghe maraveose e cuasi si faseve parâ vie.

«Compro questo!» al disè cjapant sù une sfere di cristal a câs, de scansie plui dongje. Al paià cence nancje viodi ce che il rivendicul i meteve intal sacut. Lu vierzè a cjase e il destin al fo, come simpri, perfet simpatic… Un mont di MONTS. Nol podeve jessi miôr, chel so prin acuist par la colezion di ambientazions che al veve intenzion di tacâ.