O sai di jessi une vore ingorde, chi a Cjarlins une come mê la clamin “sfunzicade”, di dolçs po’ no stin nancje a fevelâ!
No dome di dolçuts, ma propit cun chêi o ài començât di piçule la mê cariere di robariis: une volte scuviert che la clâf dal armâr in cjamare di mê mari e jere la stesse dal comò… voltiti mont! In tal zîr di un marilamp o ài fâts sparî un biel pac di wafers, formât famee, miôr di Silvan il mâc!
Zaromai di un biel pôc di timp o tiravi lis orelis a scoltâ i discors jenfri gno pari e mê mari: o sintivi a fevelâ di ratis, un biel numar di lôr, ma gno pari LA VOLEVE e l’unic mût par vêle, par un molzidôr, ven a stâi i paria, i ultins inte scjale sociâl, al jere propit chel di comprâle a ratis e al Tôr, la buteghe di eletrodomestics dal Sior Sorato, e judave cussì ancje i ultins in classifiche.
E je rivade, a la fin, poiade suntun carel neri cun doi riplans di veri, un bocon di bussulot scûr e cun sot, intal riplan di veri une robe di fier (il gno om eletricist mi à dit che tal so nol jere il “stabilizzatore di tensione” par talian). Parsore di chest bocon di bussulot o vevin vût in regâl un ridicul abat-jour, che forsit al servive par vê un pôc di lusôr inte stanzie cuant che o cjalavin la television, intal câs che si jevassin sù de cjadree par no lâ a sbati cuintri cualchi picôl o spiç di no sai ce. Un mont, dentri di chê scjate, che al mostrave l’isolament trement di chel cjasâl li, indulà che o vivevin, la Famule, regalant cussì a chê frute ingorde no dome di wafers, ma di dut chel che al slargjave l’orizont di là da la stale, di là da lis povoladis… di là… di là di… dut chel che o sintivi la mancjance, forsit di un mont fat di int, di contats, di salûts, bocje di ridi, cjacaris, ridadis.
O començavi a vivi intal moment che al sparive il monoscopi cu la musiche che e faseve vignâ jù la rêt, scuasi come chê di un cogôl: al sucedeve tor lis cuatri e mieze cui programis pai piçui, ven a stâi “la tv dei ragazzi”. O jeri come un plen di sêt intal desert e mi bevevi dut, propit dut! Cartons animâts, senegjâts, telefilms, contis di un pirate tartaiot inte nâf da la none dal corsâr neri (Pietro de Vico e la sô femine Anna Campora), lis flabis di Paolo Poli, indulà che lui, sentât suntune cjadree a ti tirave fûr dome cul cambiâ i tons de vôs une slavine di personaçs, un teatri intîr inte sô vôs e inte nestre fantasie… ingrisui di no crodi di tant brâf che’al jere (no dome al jere, parcè che none Barbara lu à viodût ancje in teatri e nol è cambiât di une virgule!) Ma mi zupavi ancje Enza Sampò cu la rubriche pes fantaçutis, mê mari no si deve pâs a viodimi cussì inçusside daûr de television, parfin a parecjâ la taule o fasevi dut cuntun voli a la television! O bevevi ogni peraule di chê scjate magjiche, fin a rivâ al “Carosello”: e li purtrop, a no jerin ni sants e ni madonis, si veve di lâ sù pai taps! Sfunzicade come che o jeri (e o soi) no mi rassegnavi a no viodi chei biei senegjiâts di Antongiulio Maiano, che a fasevin dopo Carosello e o vevi studiât, vie pal dì, une gjincane jenfri lis breis fûr des cjamaris par memoreâ chês che a cricavin e poiâ i pîs cussì dome su chês cidinis… O vevi lassade a pene a pene metude dongje la puarte par no fâ sintî nancje il cric de sieradure e, tal cidinôr de cjase, un pît su la bree buine e chel altri cu la gjambe ben vierte par rivâ a chê altre bree che no cricave, cul cûr in bocje e i tambûrs intes orelis, a la fin o soi rivade in cusine. Il volum scuasi al nuie, tacade a la television o stevi cjalant Alberto Lupo che al recitave inte “La Cittadella” e… di bot e sclop a no si pie il lusôr intal tinel e la staze zigant di gno pari e jentre in cusine come une bissebove, berghelant, blestemant e cul braç tignut a la maniere di une spade mi segne la vie de cjamare!
E je ben vere che jo a gjo pari je varès ancje petade, ma ben a mê mari no i scjampave nuie e la mê ritirade e puartave onôr a jê, che mi deve dîs a zero in furbetât e companie biele!
di Barbara Battel
#553
8 comments On Benedete television
Ce biel furlan Barbara, a tu sês stade a scuele di cualchidun di sigûr e a tu âs imparât une vore ben. La conte a si lei dut un dret cun plasè. Mandi e benvignude, Bepi
Barbara, tu as dismot ricuarts lontans indula che il poc al contentave tant di plui dal masse di vue.Mi plas le conte pe so realtat passade o poc o trop di ducj chei di une certe ete di vue. Lussian
E brave la gnove contecurtare! Fâs plasè che la ostarie a si slargji simpri plui, soredut cun aventôrs cussì brâfs.
Barbara, tu mi âs fat vignì iniment Il mulino del Po di Sandro Bolchi e Una tragedia americana; cence contà Lascia o Raddoppia.
Nô o levin a viodile te ostarie e o scugnivin puartâsi la cjadree di cjase, tante e jere la int a viodi.
Graciis par vemi fat tornà indaûr di 55 agns.
Mandi
Mi varès plasût cognossi il carosel di noms e di fats nomenâts in te conte par podê miôr
gjoldile o almancul savê di ce che al podeve tratâsi parce che le conte a é ben tirade ma par
chest o varès di vê cjalât le TV se no in te stesse cusine, almancul tal stes timp. Ma o jeri lât a stâ
tal forest par no lâ sot de naje.Daspó par lâ su la Sampó e fâ ne rime tu mi âs fat
pensâ che si varès viodût il stes program o varès podût savê che 'l gno capo Joseph Sampó
al jere talian seben che al pretindeve di no jessilu parce che in te Belgjiche di chê volte i varès
someât di usurpâ il so grât cuntun non di subalterni.
Su lis waffels, che tu clamis wafers, no sai
se si trate de stessis galetis ma se a son fatis di farine e oufs cule spongje e un pôc di lat
a puedaressin sei clamadis ancje gauffres e cun di plui made in Belgjum:-)
Achi o sieri le puarte ancje jo augurantcji le benvignude cu lis pensadis che le tô conte mi à fat vignî sù.
Jaio
E contecurte e cres in contecurtârs e in cualitât. E devente simpri plui un cjanton, une gote pal rilanci de lenghe furlane. Brave Barbara, no dome pal so biel furlan, ma ancje par veus fat ricuardâ agns de nestre zoventût.
Barbara, biele dôs voltis, mi soi gjoldude la conte dome pal fat di cemût che tu tu le contis, za che no le cognossei e di conseguence nancje i personaçs de epoche che le popolarin. Mi vevin menât a vivi intune altre part di mont, dulà che la TV al grant public e rivà cualchi an dopo.
Benvignude
Bepi, Lussian, Pauli, Yaio, Nello, Galliano o pues dome che dîûs un grassie une vore bocon pal bon acet che mi vês dât: mi vês regalât i plui biei compliments che mi comovin. La braure di che frute, bessole lontan di ducj, cuant che e jere piçule, cumò e je propit chê di dismovi cui miei ricuarts (dolçs, la dolçece de puaretât) i ricuarts di cui che mi lèi…Par te Yaio, prove a lâ a viodi su youtube e tu cjatarâs plui di cualchi filmât cui personaçs che tu 'nd às let. Barbara Battel
E dopo carosello DUC A DURMI'mi visi quant che a ciase me aie rivade le televion,eri talmenti incuriosit specialmenti da antenne che vevin mitut sul tet,e mi domandavi: ma simut Mario Riva el fasie a passà pa antenne.Tant stupit cà ieri……Bei ricordi Barbara un bacione Andrea