6 di Avrîl dal 2024

La Stagjon des Contis a Cjamin

Cjamin dal Tiliment, ai 6 di Avrîl dal 2024
Auditorium de Biblioteche

Dopo dute la ploie e il soreli di chescj ultins dîs, rivâ a Cjamin dal Tiliment, li de Biblioteche, voglant il stralûs des aghis dispiticât dal svoletâ des razutis al è un gust che za di bessôl al vâl il spetacul.

Ma noaltris, il spetacul, o vevin ancjemò di fâlu, e si tratave de presentazion dal nestri libri saltât fûr de Corsecurte22, La Stagjon des Contis, firmât in maniere coletive de Ostarie Contecurte, che al tire dongje une biele grampe di contis. Ma aromai lu savês ben, ancje se il libri al è simpri chel, i spetacui di presentazion a son ducj diferents! Sì che, invezit di lei 6 contis di chês che no jerin metudis tal libri ma jerin istès bielonis, o vin pensât di lei un pôc e un pôc e ancje di meti dentri altri. Da rest, o sin soversîfs, si sa, come che o pensìn une robe o pensìn za a la maniere di cambiâle.

Ma fasìnle curte, va, che lis nestri contis cussì a son stadis ancje a Cjamin, ta chest puest bielon, l’auditori, cui scjalons a fier di cjaval, che a saran ben scomuts pes schenis de int, ma vûstu meti ce fotografiis artistichis che ti saltin fûr! Soredut daspò che l’aperitîf al à precedût il spetacul, che bon, al à tirade dongje pocje int, ma si son divertûts come se a fossin trê voltis tant.

Si che… ce vino di contâus? Forsit che il nestri Famei al à volût lei(si) la conte Zornade cjolte drete dal mês di Jugn e restade fûr dal libri par un sbit? E che al à volût lei ancje Mascaron Angolan, conte dal libri, che i plâs une vore? O ben, podìn ancje dî che le à lete tal puest di une conte sperimentâl che i vûl coraç a publicâ e difati cuissà se la publicarìn!

E dopo o podìn contâus che o vin vût leturis de Sartore (Dutis lis rosis ch’a mi regalin, Il tesaur dal flum) e dal Muini (The little drummer boy). E clare, o vin vude une biele selezion di Ontecurtutis, che come simpri, a cualchidun lu lassin cuntune muse di pêt, e a cualchidun altri lu fasin ridi a sbreghebalon.

E se o crodês che in chei trê cuarts di ore di spetacul ju vedin jemplâts… no! L’ostîr al à sdrumât ducj cuntune leture di dôs poesiis in lenghe origjinâl, bielononis, di lustrâsi lis moschetis come un gjat devant di un salam. E o crodìn propit che lis tornarin a lei, insiemi a altris di chest gjenar. In sumis… spetacul par pôcs, ma cun dentri une vore di robis e noaltris, robe plui impuartante, si sin gjoldûts.