CorseCurteJugn#24 – La zornade

#24 – La zornade

Ma parcè la zornade ise cussì curte? O ai cetantis robis di fâ che no rivi mai a distrigâ dut. Sveâmi al cricâ dal dì, molzi lis vacjis inte stale e regolâlis, lâ fûr a bagnâ l’ort, arâ cuant che al è di arâ, grapâ cuant che al è di grapâ, samenâ, bagnâ i cjamps, viodi cressi lis plantis, bati, fâ lis balis di stran e di jerbe, meti il forment, la blave, la soie, il vuardi, la siale tai dipuesits: nol è mai timp avonde!

Insome, une zornade par me e varès di durâ almancul setantedôs oris invezit di cuarantevot!
E invezit, ta chest planet che al orbite ator de stele Tau Ceti, la zornade e dure cuarantevot oris cun vincjecuatri oris di lûs e vincjecuatri di scûr. Nol è avonde, no?
Mi riferìs a “oris”  come a chês che o vês su la Tiere.
Par chel che al rivuarde lis bestiis jo lis clami vacjis ma non son veris vacjis. Intant a son grandis il dopli des vacjis de Tiere e dopo a àn sîs gjambis, cussì a rivin a stâ sù miôr in pîts. E dopo, rivuart a lis  plantis che o ai citât prime, a part che a son dutis OGM, però o ai simpri di stâ atent a lôr, soredut al vuardi. Al è un fat che si dislidrise di bessôl a voltis par lâ a passonâ tal cjamp o fûr dal cjamp lant a cirî i puescj dulà che i rive plui lûs o plui aghe. O ai scugnût centâlu par che nol torzeoni e dâi des razions extra di aghe e inluminâlu cui proietôrs cuant che la lûs dal Soreli, o miôr, di Tau Ceti, no i rive a cause dai nûi.
Ma nol è chel l’unic probleme. No ai voie di elencâju ducj i miei problemis che a son cetancj. Rivaraio tai miei cent e cincuante agns di vite a conservâ la mê colonie-model? No sai trops agns che mi restin di vivi, naturalmentri considerant il timp de orbite dal gno planet ator de stele che al è metât di chel de Tiere ator dal Soreli…Ta

di Checo Tam (Tapioca City)
#1306