Contecurte e va ae Universitât

Glemone ai 14 di Març dal 2011
Sede UTE

La nestre ostarie, par volontât dal ostîr, i à simpri tignût a vê un un aspiet didatic, che al podedi insegnâ a scrivi e lei par furlan, par scomençâ, ma ancje a veicolâ contignûts di ogni sorte cu la lenghe furlane. Al è stât cun gjonde, duncje, che il nestri Ostîr al à acietât l’invît di Giuliana Pellegrini, contecurtare doc, a lâ a tignî une lezion inte Universitât de Tierce Etât di Glemone. Magari par rivâ, cuissà, a stiçâ cualchidun a scrivi o lei par furlan. La robe e pâr vê vût une vore di sucès, stant ae sodisfazion dai students ae fin.

Ce ajal fat l’Ostîr? Nie… al à spiegât che lei par furlan al è facil (cuntun biel document par imagjins cu lis regulis di fonde). E daspô al à let un pocjis di contis che i plasevin a lui, doprantlis par spiegâ ce che i cjatave di biel e parcè che lis veve sielzudis. Al è stât une vore biel, ancje, ricevi une interpretazion gnove a une sô conte e viodi cemût che al è biel traduzi lis contis di une lenghe a di chê altre.

Riferiments

• Articul su Contecurte