Contecurte Richinveldiche

O vin una vore di robis di contâus dai spetacui che o vevin impins cheste setemane, a Cjamin e a San Zuan al Nadison, ma prime di chel o vin gust di sparniçâ une gnove che nus rivuarde, e che e je capitade îr a San Zorz de Richinvelde, zornade che e viodeve la premiazion dal concors Racconti tra Meduna e Tagliamento, edizion 2023.

Alore… anìn par ordin. Tant par scomençâ, o savês ben che chest concors leterari al è une vore ben volût di noaltris di Contecurte, stant che si pues mandâ contis par talian e par furlan. Di chest an, cun di plui, e jere la novitât che si vevin aumentâts i premis e par il furlan e jere une sezion di pueste, premiade insiemi a lis primis trê contis par talian.

Il concors al jere dal 2023, e al veve vût une proroghe, robe che mâl no i à fat, stant che inte publicazion che o viodês, simpri ben fate e elegante, in bande dai 12 finaliscj a jerin ancje une altre biele grampe di contis, dutis publicadis. Il teme, come che o savês, al jere “Storie vere o fantastiche ambientate tra i due fiumi”

E come che o savês, forsit, noaltris di Contecurte o rivin dispès a partecipâ e ancje vinci. E in efiets, l’an passât la sezion par talian le veve vinçude il nestri Ostîr, e l’an prime la nestre Coghe, e l’an prime ancjemò il nestri Ostîr, e insome… la veretât e je che Chei de Ostarie a àn imparât a scrivi avonde ben, dai.

E chest an, cemût ise lade? Ben po… o varês capît che e je lade ben… Ma une vore ben! Tai 12 finaliscj o vevin no un, no doi, ma adiriture trê di Chei soversîfs di Contecurte: Astrid Virili, la nestre Sartore, cu la conte Autostrade de roste; il nestri Berlon Michele Londero, cu la conte Dal cret, dutis dôs par furlan, e il nestri Ostîr, che aromai par furlan nol scrîf plui, al va indenant a cjapâ gust di scrivi par talian, e ancje lui al jere in finâl, cu la conte Le rane.

Ven a stâi che la conte dal Berlon e je rivade prime, vincint il premi speciâl pe sezion de lenghe furlane, pecjât che chel dordul dal nestri Berlon al nol podeve lâ te premiazion e ve li, la Sartore che e ritire il premi tal so puest. Po dopo, pe sezion taliane, al à vincût il nestri Ostîr, che cun di plui al à fat vaî un pocje di int dal public, cu la so conte nere e plene di maluserie, si pûr plene di amôr. In sumis, Contecurte e à dominât il premi ancje chest an… cuissà, al sarà par chel che il concors si cjape une polse.

Us lassin, achì sot, un sbrendul dal judizi de jurie su la conte dal Berlon, une vore biele e origjinâl. E ancje un sbrendul dal judizi de jurie (Claudio Romanzin, Annarosa Francescut, Paolo Venti) su la conte dal Ostîr, une vore emotive e di impat sociâl.

Al secont e tierç puest, cun altris dôs contis di gale, o cjatin Sparizioni, di Laura Chiarandini, e Parli, tu, di Giuseppe Mariuz, che aromai si cjatin simpri, insiemi cul Ostîr, in cetancj concors.

E cun di plui, i nestris compliments ae Pro Loco San Giorgio della Richinvelda pe serade, ben jessude, cu lis leturis integrâls des contis, un clime di snait e lizêr, che no si è fat sgrifâ di nuie, e un ghiringhel finâl che nol à mai di mancjâ!

Ve ca alore, che la zurie e à dit de conte dal Berlon che: “Il racconto presenta una ricchezza lessicale che esalta la varietà friulana in tutte le sue sfumature, sia dal punto di vista linguistico che musicale. A ciò si unisce l’attualizzazione coerente e intensa di una delle tematiche antropologicamente più caratteristiche della tradizione friulana e mitteleuropea.”

E rivuart ae conte dal Ostîr ve ca che il judizi al diseve che: “Tematiche di spessore come il fine vita, l’omosessualità e gli stereotipi di genere si intrecciano in una vicenda che tiene il lettore sospeso fino alla sorpresa finale. Il fiume e le sue atmosfere vengono rappresentati con pennellate dal sapore a tratti poetico, creando un’atmosfera suggestiva e ricca di sensazioni palpabili. La scrittura è potente, intelligente e originale”

Insome… al fâs ben a lâ simpri in grave. 🙂

3 comments