Ostîr e Coghe di lâ dal Tiliment

Il 2020 al è stât un an strani, dulà che tantis robis no son stadis fatis, altris si son slungjadis, e cussì ancje lis manifestazions e i concors leteraris.

Un concors par contis che al à viodût la sô sierade îr di sere, intun incuintri sul web inmaneât de Pro-Loco di San Zorç de Richinvelde al jere il Premio Richinvelda, che al sburtave a scrivi contis ambientadis “tra il Meduna e il Tagliamento. Stant che il concors al jere viert sedi al talian, sedi al furlan, il nestri Ostîr e la nestre Coghe (che aromai il talian no lu san nancje plui) a àn decidût di partecipâ. Prin un e dopo chel altri, a son lâts a viodi il paisut de Richinvelde, framieç dai doi flums, che al è tornât bon par jentrâ ancje te storie des lidrîs furlanis (pe vicende dal Patriarcje) e fa un zîr sui claps dal jet de aghe, cuant che inmò si podeve lâ un pôc ator.

Insome, la biele gnove e je che ducj i doi, cu lis lôr dôs storiis, a son rivâts dentri dai 12 finaliscj e l’Ostîr al à parfin vinçût il concors! Robononis, insome. La conte dal Ostîr si clamave “Claputs” e le à scrivude propit intan che al jere daûr a comedâ i post dal “Cemût si zuial“, juste par dî che lui, in Ostarie, al robe simpri alc a cualchidun (comprendudis lis corezions de Coghe, che se no fos par jê pues crodi se al cumbinave). La conte de Coghe invezit si clamave “Tramis di glerie”. A si podaran lei te publicazion che e je stade fate pe ocasion de Pro Loco, e che al è pussibil domandâ ae associazion. Intant però noaltris de ostarie us metìn chi sot i doi incipit, che si sa, a son une vore impuartants intune storie. Da rest, come che un viaç al scomence cul prin pas, une storie e scomence simpri cu lis primis peraulis.

Claputs

Lassù
sul clap
al basta slungjâ
‘na man.
Al basta
slungjâ
al penseir.

Tor sere, in chescj ultins sunsûrs de Sierade, cuant che mi senti su la piere glaçade dal muret che al cercene la gleseute di San Nicolau, mi pâr cuasi di viodilu, il cidinôr che al jes dal cimitieri e al cjape coraç, disvoluçantsi pe strade e strissinantsi tal scûr parsore de jerbe, fintremai a lenzi la piere dal Patriarcje e tornâ indaûr, come par dîmi che nol à cjatât nissun. Nissun che lu rompi; nissun che lu jempli di cualchi sunôr, inmò mancul di une peraule, se no l’aiar di tramontan, che al scjasse e dispetene lis vignis dulintor, daspò di jessisi jevât sù dal jet dal Midune.

___________ *** ___________

Tramis di glerie 

La machine e sbrisse vie cidine pes stradis di paîs, ciulant a pene denant di une crosere o di une taronde, cuasi a no volê scjassâsi dal legri impisuliment che le à cjapade a pene passât il puint sul Tiliment.
Provincie di Pordenon. “Segui il nostro cuore”, al jere il slogan dal sît turistic cualchi an prime di chê menade des Uti. E in efiets al è propite il sens dal viaç di Rico, ancje se no al à ben clâr indulà che lu menarà chest colp di mat. Anzit, il puest lu à, ma al è di une vite che nol torne. O miôr, di une muart. Dal funerâl dal pai. L’ultin ramaç che al tignive picjade la tele de sô esistence a chest cjanton di Friûl. Il piçul compendi dal Univiers. Bugnigul dal mont par cualchidun, buse di cûl par altris.

___________ *** ___________

Par finî in bielece, us disìn ancje che une storie par furlan, in variant dal furlan ocidentâl, scrite di Giuseppe Mariuz, e je rivade seconde e o sin une vore seneôs di leile. Insome… disin che il trop dai scrivints furlan si è ben difindût tal concors e o vin gust.

E za che o sin che o fevelin dal 2020, ancje se la gnove e je vecje, o vin plasê di saludâus cu la poesie de Coghe che e à vinçût, simpri di chês bandis plui innà dal Tiliment, il prin premi tal concors Concors di poesie “Uno scritto d’Amore – Amore ti scrivo” 2020 di Cjasteons di Çopule.

 

1 coments On Ostîr e Coghe di lâ dal Tiliment

  • Son vitoris plasevulis che vegnin fûr de nestre ostarie, a spandi ator pal mont le bontât dai soi prodots. Compliments al ostîr e Fogoline. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît