CC24Març#30 – Sgrisul

#30 – Sgrisul

De spice de mont, Artos al cjalave la plane furlane. La jù, viars il mâr, al jere il municipium di Aquilee, di dulà che al jere partît doi dîs indaûr.

Si veve distacât de code dai dispatriâts e al jere lât là sù cu la sperance di podê viodi la sô citât par une ultime volte. Ma no cate che il cîl al jere limpi, ta chê frescje zornade dal cricâ dal Invier dal an DCCII ab Urbe condita, une lizere fumadice no i permeteve di viodi cussì lontan.

O forsit a jerin lis lagrimis, che cumò i gotavin jù pai smursiei, a no fâi viodi ben.

Aquilee… Une citât fondade dai romans invasôrs passe cent agns indaûr; che i siei bisavons a vevin scombatût di bant. E pûr, lui, Artos, fi di un popul sconfit, le clamave la sô citât.

Biele, supierbe Aquilee. Nol varès mai volût sbandonâle.

Ma cuant i ilirics le vevin assaltade adun cun Triest, biel che Cesar al jere a fâ vuere te Galie… ce i restavial di fâ?

Une part dai citadins e je restade lenci vie par mendâ lis muraiis. Chei altris, come lui, a vevin scugnût cjapâ sù ce che a podevin e metisi in strade vie pal cardo maximus in direzion di Tresesin e Zui, par fortificâju.

E propri il piçul vicus di Zui al jere la sô destinazion.

Artos si voltà par cjalâ di chê altre bande de mont. Sot di lui, il Tiliment, e plui indevant il Bût. Al rivave fin a viodi la colone dai sfolâts che e proseguive, dute malsacodade, pe strade romane.

“Zui, eh?” dissal fra sé. “Cuissà se la vuere e jonzarà fin ca sù tes monts”.

Un sgrisul i corè jù par cuel e schene. Ma nol jere par vie dal aiar.

di Enrico Tomasi (Secretariât)
#1597

1 comment