CC20_La Padiele di Setembar

E us vin fat spietâ, ma si sa che i professôrs a son simpri plens di impegns, fûr e dentri scuele, e cualchidun al à fat fature a corezi i compits e meti il vôt a dutis lis contis. Ma dutcâs, us din subite la biele gnove che ducj i 10 professôrs dal vuestri Consei di Classe a àn votât e ca sot, par plene clarece, us lassìn daûrman dutis lis votazions che lis vuestris contis a àn cjapadis. No cjatais la materie che us à dât chest o chel voto, stant che ogni professôr al valutave distacât de sô materie. Par lei cun criteri la tabele, us visìn ancje che si podeve da un voto di 1 a 10 e il Dirigjent Scolastic al à dât ai siei docents la massime libertât. Ce vuelial dî? Che come che o podês viodi a son docents che a doprin duta la scjale des valutazions e altris che si contentin di une variabilitât plui ridote; a son docents che a àn une medie valutative basse e altris che le àn alte. Nuie di mâl, al jere un probleme che l’Ostîr al saveve za di scugnî risolvi cuant che si sarès tratât di passâ de Padiele ae Classifiche (Eh, sì, cheste e je pûr simpri une gare…)

Ma vonde cjacaris e intant dait un cuc a lis valutazions.

Us zontin ancje che fasint lis mediis dai votos, il prof. plui “di manie largje” al è stât chel de colone numar 7, cuntune medie di 8,47; il prof. plui “tirât” al è chel de colone 5, cuntune medie di 4,91. E se anin a cjalâ la deviance (ven a stâi la variabilitât dai votos) chel plui static al è il numar 3, cuntune deviance di 0,41 ponts, e il plui “lunatic” simpri chel de colone 5, che al à une variabilitât di 2,20. Ma dut chest al è dome pai amants des statistichis. E simpri par lôr, se a àn gust, us disìn ancje che la medie de classe e je stade di 6,97 (gjavât vie il student che nol à consegnât). In sumis… une vore alte!

Ma vignin al passaç di Padiele a Classifiche. L’Ostîr… ops, il Dirigjent Scolastic, al à passât dute la sere e passade miezegnot a cirî di risolvi i fastidis che al veve denant e al à cjapât lis sôs decisions. Se no sês dacuardi us ricuarde che il biel al è scrivi e la classifiche al è dome un divertiment, un zûc, ma soredut us dîs che… il Dirigjent al è lui e si fâs come che al dî lui 🙂

Prim probleme al jere chel di un student che nol rive a consegnâ i compits. Chest mês al è stât un sôl, che nol veve Justificazions. Clare che no si pues dâ zero, si no, cuant mai al recuperie chest puaret. Sì che duncje la sielte e je stade fate inte maniere plui logjiche e di bon sens. Chest student al à cjapât il voto plui bas di ogni professôr. Clare che al è ultin, ma al pues pontâ istès a gjavâsi lis sôs sodisfazions cui mês che a vegnin.

Di chê strade o vin ancje decidût ce valutazion che al cjape un che al à une justificazion. Al cjaparà la medie des valutazions di ogni prof. Ven a stâi, ni ben ni mâl… tal mieç.

Altri fastidi. Lassâ cjarte libare ai prof al va ben, ma cheste e je une gare jenfri contis e no jenfri professôrs. Ce vuelial dî? Che la padiele e pues ancje mostrâ lis variabilitâts des votazions (alte o basse che e sedi) ma no si pues fâ sì che un docent, cuntun voto fur scuare une vore alt o un une vore bas al decidi il destin di un student. E alore? E alore ve ca la regule. Come che al capite in ducj i sports cun tante int in zurie, la valutazion plui alte e chê plui basse no son stadis contadis inte medie, che e reste il valôr di classifiche. 

Daspò de medie, tal câs (avonde râr) che si viodi doi students a pâr, e je stade considerade la deviance, e daspò di che la condote, che come che us vin za dite e je alte par ducj, stant che i parametris par il vôt a son il timp, lis falopis, la misure e il teme de conte. A proposit, la condote no je stade contade tra lis valutazions di gjavâ, ma je stade contade te medie, e come che si jere dit, e môf une vore pôc lis robis. Dut clâr? O crodìn di no, e che us sarà za vignût mâl di cjâf, ma no stêt bacilâ masse. I conts ju fâs excel, il vuestri lavôr al è divertisi a scrivi contis.

Dutcâs, cemût ise la classifiche di Setembar, che dutcâs, jessint il prin mês, e je ancje la classifiche gjenerâl. Vele ca:

Si che duncje, Ash Ketchum al è denant di ducj, ma in pratiche a pâr cun Cinoc, Conastri, Madame Strafuei e Papine Montessoriane ma come che al jere prevedibil la classifiche e je curtissime e al baste un voto diferent di 2 o 3 ponts (Il dirigjent al à provât) a fâ pierdi o vuadagnâ 10-12 posizions. Ducj chei 5-6 là sù, cuntune medie voto tor i 7 e mieç, a son visâts…

Bon. Par vuê vonde gnovis. Magari, ca di doi-trê dîs, o fasarin un articul par fevelâ des impressions di cualchi professôr, des sieltis dai students e des manieris di frontâ il teme. Par cumò… pensait ai compits di Otubar!